बैतडीमा गाउँपालिका अध्यक्षमाथि कुटपिट, ५ प्रहरीसहित ११ जना घाइते

समाचार

ललित बोहरा बिहीबार, असोज २९, २०७७ ०६:२९

बैतडी–बैतडीको सुर्नया गाउँपालिकाका अध्यक्ष बीरबहादुर विष्टमाथि कुटपिट भएको छ। गाउँपालिका केन्द्रको विषयमा विवाद कायमै रहेका बेला तालाबन्दी गरेका स्थानीयले ताला खोल्न गएको भन्दै अध्यक्षमाथि कुटपिट गरेका हुन्।

बुधबार साँझ भएको झडपमा गाउँपालिका अध्यक्ष बिष्टसहित ११ जना घाइते भएको गाउँपालिका उपाध्यक्ष लिला विष्टले जानकारी दिइन्। घाइते हुनेहरुमा ५ प्रहरी तथा ६ जना आन्दोलनरत पक्षका व्यक्ति रहेको उनले बताइन्।

अहिले गाउँपालिकाको वडा नम्बर ५ स्थित रौलेश्वर कठ्यागौँडमा अस्थायी केन्द्र रहेको छ। तर २०७६ पुस ९ मा कार्यपालिकाको बैठकले वडा नम्बर ५ कै पविता भन्ने ठाउँमा केन्द्र राख्ने निर्णय गरको थियो। अस्थायी केन्द्र रहेको ठाउँबाट अन्यत्र केन्द्र सार्न लागेको प्रति असन्तुष्ट रहेका ब्यापारी र स्थानीयले विरोध गर्दै आएका थिए।

असन्तुष्ट पक्षले स्थानीय अर्जुन मडैको सयोजकत्वमा गाँउपालिका केन्द्र सघंर्ष समिति गठन गरि विरोध गर्दै आएका छन्। यसैबीच यसैसाता बसेको कार्यपालिका बैठकले १५ लाख रकम नयाँ ठाउँमा केन्द्रको संरचनाका लागि छुट्याएको भन्ने हल्ला बाहिर आएको भन्दै विरोध झन् बढेको हो। उनीहरुले सोमबार साँझ गाउँपालिकाको कार्यालयमा तालाबन्दी गरेका थिए।

मंगलबार र बुधबार गाउँपालिकाका पदाधिकारी र संघर्षरतपक्ष बीच छलफल भएको छ। तर दुई दिनको छलफलविना निष्कर्ष टुंगिएको छ। बुधबार साँझपख भने एक मुचुल्का तयार गर्दै गाउँपालिका अध्यक्ष बीरबहादुर बिष्ट ताल्चा तोड्न कार्यालयको ढोकामा पुगेका बेला अध्यक्ष विष्टमाथि ढुंगा प्रहार भएको बताइएको छ।
घाइते सबैको अवस्था सामान्य रहेको छ। अहिले उनीहरुको स्थानीय स्वास्थ्य संस्थामा प्राथमिक उपचार गरिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।