काठमाडौं- डाँका, शरीर बन्धक र संगठित अपराधको आरोपमा मुद्दा खेपेका प्रहरी नायब उपरीक्षक (डिएसपी) कुमोध ढुंगेलका लागि सेवामा फर्कने बाटो खुलेको छ। सर्वोच्च अदालतले शुक्रबार डिएसपी ढुंगेललाई साधारण तारेखमा राख्न आदेश दिएसँगै उनलाई सेवामा फर्कने बाटो खुलेको हो।
२०७५ चैत २६ गते काठमाडौंस्थित लालेन्द्र शेरचनको घरमा शरीर बन्धक बनाई लुटपाट गरेको अभियोगमा पक्राउ परेका व्यक्तिसँग फोन सम्पर्क गरेको देखिएपछि उनलाई निलम्बन गरिएको थियो।
उक्त घटनामा महानगरीय प्रहरी अपराध महाशाखाले विक्रम श्रेष्ठसहित तीन जनालाई पक्राउ गरेको थियो। तिनै श्रेष्ठसँग भेटघाट गरेको र फोन सम्पर्क भएको देखिएपछि ढुंगेलको भूमिका शंकास्पद भएको भन्दै प्रहरी प्रधान कार्यालयको सिफारिसमा तत्कालीन गृहसचिव प्रेम राईले २०७६ बैसाख १९ गते ढुंगेललाई निलम्बन गरेका थिए ।
पछि कुमोधविरुद्ध डाँका, शरीर बन्धकको मुद्दा जिल्ला अदालत काठमाडौंमा पुगेको थियो। सोही मुद्दाको सुनुवाइ गर्दै गत असार २ गते ढुंगेललाई जिल्ला अदालत काठमाडौंका न्यायाधीश कोमलप्रसाद आचार्यको इजलासले साधारण तारेखमा रिहा गर्ने आदेश दिएको थियो। त्यसपछि निलम्बन फुकुवा भएर उनी काममा फर्किएका थिए।
तीन वर्षभन्दा बढी सजाय हुने सक्ने अपराधको कसुरमा जिल्लाको आदेशविरुद्ध सरकारी वकिल कार्यालय उच्च अदालत जान सक्ने कानुनी प्रावधान छ। सोहीअनुसार जिल्लाको उक्त आदेशविरुद्ध जिल्ला सरकारी वकिल कार्यालय, काठमाडौं उच्च अदालत पाटन पुगेको थियो। उच्च अदालत पाटनले गत पुस १६ गते ढुंगेलसँग १ लाख रुपैयाँ धरौटी माग गरेको थियो।
उच्च अदालतका न्यायाधीश दीपेन्द्रबहादुर बम र जगतबहादुर थापाको संयुक्त इजलासले अपराधमा संलग्न विक्रम श्रेष्ठलाई डिएसपी ढुंगेलले पाँच पटकसम्म फोन गरेको, घटना भएका दिन श्रेष्ठसँग ढुंगेलले चक्रपथमा रहेको भेनस रेस्टुरेन्टमा भेट गरेको भन्दै धरौटी माग गरेको थियो।
उच्चले धरौटी माग गरेपछि उनी स्वतः निलम्बन भएका थिए। उच्चको आदेशविरुद्ध ढुंगेल माघ १३ गते सर्वोच्च अदालत पुगेका थिए।
सर्वोच्चका न्यायाधीश पुरुषोत्तम भण्डारी र प्रकाशकुमार ढुंगानाको संयुक्त इजलासले उच्चको निर्णय उल्टाउँदै उनलाई साधारण तारेखमा रिहा गर्न आदेश दिएको हो। सर्वोच्चको आदेशमा भनिएको छ, ‘काठमाडौंमा लुटपाट भएको भनिएको २०७५ चैत २६ रहेको तर उनी २७ गतेसम्म इलाका प्रहरी कार्यालय चन्द्रनिगाहपुरमा हाजिर रहेको देखिएकाले लुटपाटमा संलग्नसँग काठमाडौंमा भेट भएको भन्न मिल्दैन।’
अन्य प्रमाणबाट पनि लुटपाट भएको समयमा डिएसपी ढुंगेल काठमाडौंमा रहेको भन्ने प्रमाण फेला नपरेकोले उनीविरुद्ध धरौटी लिन नमिल्ने तर्क सर्वोच्चको छ। सर्वोच्चको आदेशपछि ढुंगेल पनि सेवा फर्किने बाटो खुलेको हो।
ढुंगेल कोभर्ट अपरेसन (भेष बदलेर गरिने अनुसन्धान)मा पोख्त प्रहरी अफिसरका रूपमा चिनिन्छन्। रामेछापकी १३ वर्षीया सुन्तली तामाङका हत्यारा ढुंगेलकै नैतृत्वको टोलीले पत्ता लगाएका थिए। घटना भएको ६ वर्ष बितिसक्दा पनि तामाङका हत्यारा कानुनी दायरामा आउन सकेका थिएनन्।
घटनामा संलग्न व्यक्तिको खोजी गर्ने क्रममा गुन्डा नाइके भनेर चिनिएका रमेश बाहुन अर्थात् सुजन पौडेलसम्म गएर ठोकियो। हत्याबारे बाहुन केही जानकार थिए। यसबारे डिएसपी ढुंगेलले प्रहरी प्रधान कार्यालयसम्म जानकारी गराए। माथिल्लो निकायबाटै 'ग्रिन सिग्नल' पाएपछि उनले बाहुनसँग सम्पर्क बढाए। बाहुनकै सूचना र सहयोगको आधारमा सुन्तली तामाङका हत्यारालाई ६ वर्षपछि डिएसपी ढुंगेलको टोलीले भारतको अण्डमान एन्ड निकोबार टापुबाट पक्राउ गर्न सफल भयो।
सुन्तलीको हत्यारा पक्राउको घटनाले प्रहरीको शाख जोगाएको भन्दै २०७४ असार १२ मा काठमाडौंमा पत्रकार सम्मलेन गरिएको थियो।
डाँका मुद्दामा पक्राउ परेका विक्रम श्रेष्ठले पनि ढुंगेललाई अपराध अनुसन्धानमा सहयोग गरेका थिए। केही वर्षअघि रुपन्देहीमा भेटिएको बेवारिसे गाडी र चरेस कारोबारमा संलग्न व्यक्ति पक्राउ गर्न उनै श्रेष्ठले सहयोग गरेका थिए।
यसरी बारम्बार सम्पर्क हुने गरेका व्यक्ति नै डाँका मुद्दामा पक्राउ परेपछि फोन सम्पर्ककै आधारमा आफूलाई निलम्बन गरिएको उनको तर्क छ। काठमाडौंमा डकैती भएको भनिएका बेला ढुंगेल रौतहटको चन्द्रनिगाहापुरमा कार्यरत थिए।
डिएसपी ढुंगेलकै नेतृत्वमा निर्माण व्यवसायी महासंघका तत्कालीन अध्यक्ष शरदकुमार गौचनको हत्यामा संलग्न समीरमान सिंह बस्नेतसमेत पक्राउ परेका थिए।
त्यस्तै डा उपेन्द्र देवकोटाकी छोरी अपहरण गर्ने मुख्य अभियुक्त गोकुल गिरीलाई पनि उनै ढुंगेल नेतृत्वको टोलीले पक्राउ गरेको थियो। व्यवसायी अञ्जनीकुमार चाचन हत्याका अभियुक्तलाई पनि उनै ढुंगेलले कानुनी दायरामा ल्याएका थिए।
हिमालयन बैंकको ५ करोडभन्दा बढी ठगी गर्ने अनिशभक्त सुवालजस्ता नेपाल प्रहरीको 'मोस्ट वान्टेड' सूचीमा रहेका दर्जनौं अपराधीलाई उनै ढुंगेल नेतृत्वको टोलीले पक्राउ गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
