तस्बिर : निमेषजंग राई/नेपाल लाइभ
काठमाडाैं- सत्तारूढ नेपाल कम्युनिष्ट पार्टी (एमाले)को शुक्रबार प्रधानमन्त्री निवास बालुवाटारमा बोलाइएको संसदीय दलको बैठक धेरै हिसाबले फरक थियो। प्रधानमन्त्री एवं एमाले अध्यक्ष केपी शर्मा ओलीले बोलाएका यसअघिका बैठकमा वरिष्ठ नेताद्वय झलनाथ खनाल र माधवकुमार नेपाल पक्षका सांसदहरू उपस्थित हुने गरेका थिएनन्। बालुवाटारमै बोलाइएका केन्द्रीय कमिटी बैठकमा पनि खनाल र नेपाल पक्षका नेताहरूको उपस्थिति भएन।
शुक्रबारको बैठकमा भने नेपाल र भीम रावलबाहेक यो पक्षका सबैजसो सांसदहरू सहभागी भए। त्यहीकारण हुनसक्छ, ओलीले बैठकमा बोल्ने क्रममा ‘आज नयाँ मान्छे देखियो नि!’ भनेर कटाक्ष गरेका थिए। शुक्रबार बिहान बसेको खनाल र नेपाल पक्षका केन्द्रीय सदस्यहरूको बैठकले बालुवाटारको बैठकमा सहभागी हुने निर्णय गरेको थियो।
तर, बैठकमा पुग्नसाथै अध्यक्षबाट ‘नयाँ मान्छे’ भन्ने कटाक्ष भएपछि खनाल-नेपाल पक्षका सांसदहरूको बालुवाटार अनुभूति सुखद बन्न सकेन। ओली जति जति बोल्दै गए, उनीहरूले झन् बढी असुरक्षित महसुस गर्दै गए। पार्टी एकतावद्ध होला भन्ने आशासहित बालुवाटार पुगेका धेरै सांसदहरूले पार्टी थप समस्यातर्फ अघि बढेको अनुभूति गरे। किनभने त्यहीक्रममा ओलीले माधवकुमार नेपाल र भीम रावलले बुझाएको स्पष्टीकरण चित्तबुझ्दो नभएको भन्दै कारबाहीयोग्य रहेको समेत बताए।
सुरुमै झलनाथमाथि आक्रोश
संसदीय दलको बैठकको सुरुवात प्रधानमन्त्री ओलीले गरेका थिए। त्यसक्रममा उनले पुस ५ गतेको प्रतिनिधि सभा विघटन गर्ने निर्णय असंवैधानिक नभएको जिकीर गर्दै संवैधानिक कदम भए पनि अदालतले त्यसलाई नमानेकाले आफूले बाध्य भएर मान्नुपरेको बताएका थिए।
लगत्तै उनले एमालेका उपमहासचिव एवं अर्थमन्त्री विष्णुप्रसाद पौडेललाई बोल्न समय दिए पनि वरिष्ठ नेता झलनाथ खनालले बीचमै समय मागेर बोलेका थिए। बैठकमा सहभागी एक सांसदका अनुसार खनालले त्यसक्रममा भने, ‘पुस ५ गतेको कदमले प्रतिनिधि सभाको राजनीतिक मृत्यु भइसकेको थियो, तर परिस्थिति अर्कोतिर मोडिएपछि हामी पनि फर्केर आयौं। अब नेकपालाई एकतावद्ध गर्न सकिन्न भने पनि कम्तीमा एमालेलाई एकतावद्ध गरौं।’
खनाललाई बीचमै रोकेर ओलीले प्रतिवाद गरे। प्रतिनिधि सभा विघटनलाई राजनीतिक मृत्यु वा हत्या केही पनि भन्न नमिल्ने टिप्पणी गरे। बरु त्यसपछि आफूलाई पार्टीको साधारण सदस्यसमेत नरहनेगरी निष्काशन गरिएको भन्ने कुरा कोट्याए। र, त्यसपछि पौडेललाई बोल्ने समय दिए। पौडेल बोलिसकेपछि फेरि प्रधानमन्त्री ओलीले नै लामो मन्तव्य दिए। त्यतिञ्जेल खनाल भने बैठकबाट हिँडिसकेका थिए।
ओली बोल्दाबोल्दै तीनपल्ट रोके घनश्यामले
प्रधानमन्त्री ओली बोलिरहँदा खासगरी वरिष्ठ नेता नेपालप्रति लक्षित आलोचना ज्यादा गरिरहेका थिए। र, फागुन २८ गतेयता आफूपक्षधर कमिटीबाट भएका निर्णय पार्टीका निर्णय भएको जिकीर गरिरहेका थिए। सँगै आफूविरुद्ध कसरी घेराबन्दी गरियो भन्ने फेहरिस्त पनि प्रस्तुत गरे उनले। त्यसलाई सुनिरहन गाह्रो भएपछि एमाले उपमहासचिव घनश्याम भूसालले बोल्दाबोल्दै ओलीलाई रोके। र भने– ‘पार्टीलाई एकतावद्ध पार्ने स्पिरिट यो होइन, यसले पार्टीलाई एकतावद्ध बनाउँदैन।’
बैठकमा सहभागी अर्का एक सांसदका अनुसार ओली बोलिरहँदा भूसालले तीनपल्ट रोकेर प्रतिवाद गरेका थिए। ‘यो पार्टीलाई एकतावद्ध बनाएर अघि बढ्ने हो भने जेठ २ मा फर्कनुपर्छ। अब एमाले जेठ २ को अवस्थाबाट सक्रिय हुनुपर्छ’, भूसालको भनाइ उद्धृत गर्दै ती सांसदले भने, ‘त्यहाँ फर्केपछि एमालेको संरचना पनि त्यहीँ फर्कन्छ। त्यसो हुँदा फागुन २८ यता भएका कुनै पनि निर्णय विधि र पद्धतिसंगत हुँदैनन्, छैनन्। त्यसैले अब जेठ २ मै फर्कौं र छलफल गरौं।’
त्यसक्रममा भूसालले ओलीले गलत तथ्यमा टेकेर बोलिरहेको भन्दै ध्यानाकर्षणसमेत गराएका थिए। ‘तपाईं फेरि पनि गलत भनिरहनुभएको छ। प्रतिनिधि सभा विघटनदेखि फागुन २८ गते र त्यसयता भएका भनिएका निर्णय गलत हुन्, विधिसम्मत होइनन्। यो सबै मिलाउन अब जेठ २ मै फर्कौं’, भूसालको भनाइ थियो।
योगेश र गोकर्णले पनि रोके
प्रधानमन्त्री ओली बोलिरहँदा माधव नेपाल पक्षका नेताहरु योगेश भट्टराई र गोकर्ण विष्टले पनि बीचमै रोकेर आफ्ना कुरा राखेका थिए। त्यसक्रममा भट्टराईले पार्टीमा फरक विचार हुने कुरा र फरक विचार बोक्नेले आफ्ना कुरा पनि राख्ने विषय पार्टीको आन्तरिक लोकतन्त्र र जबजको स्पिरिट भएको बताएका थिए। ‘तपाईं बैठक बस्यो भन्नुहुन्छ, म यो पार्टीको सचिव हुँ, तर मैले बैठकको जानकारी पाएको छैन’, भट्टराईको भनाइ उद्धृत गर्दै अर्का एक सांसदले भने, ‘एकपक्षीय ढंगले अघि बढ्न खोजिएको छ, यसले राम्रो गर्दैन। तपाईंले ठूलो मन बनाएर आउनुपर्यो।’
बैठकमा सहभागी सांसदहरू। तस्बिर : निमेषजंग राई/नेपाल लाइभ
बोल्ने क्रममा प्रधानमन्त्री ओलीले माधवकुमार नेपाल र भीम रावलले बिहीबार बुझाएको स्पष्टीकरण चित्तबुझ्दो नभएको, उल्टै आफूमाथि आरोप लगाएको भन्दै दुवैको स्पष्टीकरण कारबाहीयोग्य भएको बताएका थिए। ‘चित्तबुझ्दो स्पष्टीकरण छैन, उल्टै मलाई यो गर्यो र त्यो गर्यो भन्ने आरोप लगाइएको छ, स्पष्टीकरण कारबाहीयोग्य छ’, ओलीले भनेका थिए, ‘अरु दुईजनाको स्पष्टीकरण आएको छैन, त्यो सकारात्मक आउला भन्ने अपेक्षा छ।’
ओली बोल्दाबोल्दै विष्टले पनि बीचमै रोकेर आफ्ना कुरा राखेका थिए। एकपक्षीय रुपमा अघि बढेर कहीँ नपुगिने भन्दै विष्टले भनेका थिए, ‘अब कुराहरु गरिराखौं, संवादका अनेक प्रक्रिया र च्यानल हुन्छन्। तिनलाई पनि महत्व दिऔं।’
वामदेवले समय पाएनन्
प्रधानमन्त्री ओली बोलिरहँदा उपाध्यक्ष वामदेव गौतमले पनि बोल्न समय मागेका थिए। तर, उनले समय पाएनन्। वामदेवले बोल्न खोजेर समय मागेपछि ओलीले भने, ‘आज मेरो अर्को कार्यक्रम छ, विराटनगरको कार्यक्रम (भर्चुअल) उद्घाटन गर्नुपर्ने छ। आजलाई समय दिन सकिएन।’
यसबाहेक बैठकमा बोलेका अर्थमन्त्री विष्णु पौडेलले भने विकास र बजेटबारे मात्र कुरा गरे, राजनीतिबारे भने केही बोलेनन्। उनले एमालेका सांसदहरुलाई आउँदो बजेटका लागि तलबाटै योजना पठाउन आग्रह गरेका थिए।
ओलीको ‘मूड’
शुक्रबार बालुवाटारमा भएको बैठकमा सहभागी सांसदहरुले प्रधानमन्त्री ओलीको ‘मूड’ आक्रामक देखिएको टिप्पणी गरे। प्रधानमन्त्री ओलीनिकट र वरिष्ठ नेता माधवकुमार नेपालनिकट दुवैथरी सांसदहरुले उनको यस्तै ‘मूड’ देखिएको सुनाए।
नेपालनिकट एक सांसदले टिप्पणी गरे, ‘हामीले जे गरेका छौं, त्यहीमात्र ठिक हो भनेर दाबी गर्नुभयो। लजिक केही नभए पनि त्यसलाई नै पुष्टि गर्ने प्रयत्न गर्नुभयो। अब करेक्सन गरेर जानुपर्छ भन्ने कुनै संकेत देखिएन, बरु विरोधीलाई कारबाही गरेर जानुपर्छ भन्ने बोली नै सुनियो।’
शुक्रबारको बैठकमा बोल्नेक्रममा प्रधानमन्त्री ओलीले आफ्नो सरकारको आयु अझैं पूरै डेढ वर्ष रहेको जिकीर गरेका थिए। ‘केही मान्छेहरु अब हाम्रो सरकार बनाउँछौं भनेर चर्का कुरा गर्थे, अहिले कोही बोल्दैनन्’, उनले भनेका थिए, ‘मलाई हटाउँछौं भन्नेहरु पनि अब त कता साइड लागे।’
ओलीले पार्टीमा गुटलाई कुनै छूट नभएको, विगतमा गुट चलाएको भएपनि अब चलाउन नपाउने समेत बताएका थिए। ‘उहाँले अब एक भएर अघि बढ्नुपर्छ भन्नुभो, त्यो भनेको उहाँले भनेको मान्नुपर्छ भन्ने टोनमा थियो’, ती सांसदले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1747928853.png)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
