नेपालले भने– राजीनामा फिर्ता लिनुहोस्, भीम रावलको जवाफ– म फेरि सोच्छु

राजनीति

डिबी खड्का बुधबार, साउन ६, २०७८ २२:३६

काठमाडौं- नेकपा एमालेको एकता कार्यदलले तयार पारेको १० बुँदे सहमति-पत्रको स्वामित्व अध्यक्ष केपी शर्मा ओली र वरिष्ठ नेता माधव नेपालले नलिइदिँदा आफूले सांसद पदबाट राजीनामा गरेको एमाले उपाध्यक्ष भीम रावलले बताएका छन्।

बुधबार बेलुकी नेता नेपाल र सुदूरपश्चिम प्रदेशका आर्थिक मामिला मन्त्री प्रकाश शाहसहित १४ जना सांसदसँग आफ्नै निवास टोखामा भएकाे भेटवार्तामा उनले यस्तो बताएका हुन्।

मन्त्री शाहका अनुसार भेटमा नेपालले रावललाई राजीनामा फिर्ता लिन प्रस्ताव गर्दै भने, ‘मेरो चाहना पनि सबै समस्याविरुद्ध एकसाथ लडौं भन्ने नै छ। साथीहरुको चाहना पनि तपाईंले राजीनामा फिर्ता लिनुहोस् भन्ने छ।’

यसको जवाफमा रावलले आफूलाई एकताका लागि सक्रिय बनाएर दुवै पक्षका शीर्ष नेताहरुले त्यसको स्वामित्व नलिएकोमा चित्त दुखेको बताए।

उनको जवाफ थियो, ‘मैले एकताका लागि इमान्दारीपूर्वक भूमिका खेलें। यसमा पार्टी अध्यक्ष, वरिष्ठ नेतालगायत सबैले धन्यवाद दिनुपर्नेमा इमान्दारीपूर्वक स्वामित्वसमेत लिने काम भएन। यसमा मेरो चित्त दुख्यो।’

किन पुगे नेपाल टोखा?
नेकपा कालदेखि नै वरिष्ठ नेता नेपालसँग निकट रहेर अन्तरसंघर्षको अग्रपंक्तिमा रहेका रावलले आइतबार एकाएक साथ छाडे। प्रधानमन्त्री शेरबहादुर देउवालाई विश्वासको मत दिनुपर्ने नेपालको चाहना विपरीत उनले सांसद पदबाटै राजीनामा दिएको घोषणा गरे।

रावल आफूसँग नराम्रोसँग रिसाएको महसुस गरेका नेपालले भेट्ने बहाना खोजिरहेका थिए। यही सन्दर्भमा रावलसँग निकट नेपाल पक्षका सुदूरपश्चिम प्रदेशका आर्थिक मामिला मन्त्रीसमेत रहेका संसदीय दलका नेता शाह नेतृत्वको टोली काठमाडौं आइपुग्यो र रावललाई राजीनामा फिर्ता लिन दबाब दिन उनको निवास पुग्यो।

एकपल्ट नेता रावलसँग भेट गरेपछि उक्त टोली नेपाल निवास कोटेश्वर पुग्यो। सुदूरपश्चिमको मात्रै होइन, देशकै नेता भएकाले रावललाई उक्त निर्णयबाट रोक्नुपर्ने माग नेपालसमक्ष शाहको टोलीले राख्यो।

शाह भन्छन्, ‘हामीले नेपाललाई भेटेर प्रस्ताव राख्यौं। उहाँ पनि एकचोटी भेटेर राजीनामा फिर्ताको प्रस्ताव राख्न तयारीमा हुनुहुँदोरहेछ। संयोगले हामी पनि राजीनामा फिर्ता लिन दबाब दिनका लागि उहाँको घरमा पुग्यौं। त्यसपछि आज सँगै रावलकहाँ पुगेर राजीनामा फिर्ताका लागि आग्रह गर्ने कुरा भएको हो।’

नेपालको योजना अन्य कुनै दिन भेट्ने रहेपनि सुदूरपश्चिमको नेपाल–रावलनिकट समूहले आग्रह गरेपछि बुधबार अपराह्न नेपाल रावललाई भेट्न उनकै निवास पुगेका हुन्।

रावलसँगको भेटमा नेपालले पार्टी आन्दोलनका विषयमा एकै ठाउँ बसेर सल्लाह गर्नुपर्ने समय भएकाले राजीनामा फिर्ता लिन आग्रह गरेका थिए। नेपालको भनाइ थियो, ‘पार्टी आन्दोलनका विषयमा एकै ठाउँ बसेर सल्लाह गरौंला। अहिले राजीनामा फिर्ता लिनुहोस्। हाम्रो पार्टीको तर्फबाट तपाईं हामी सबैलाई माया गर्नेको तर्फबाट हो भन्ने सम्झिदिनुहोस्।’

सुदूरपश्चिमका सांसदको दबाब– तपाईंले व्यक्तिगत निर्णय गर्न पाउनुहुन्न
सुदूरपश्चिमबाट रावललाई राजीनामा फिर्ता गराउन आएका मन्त्री र सांसदहरुले रावललाई आफ्नै मर्जीमा राजीनामा दिने छुट नभएको बताएका थिए।

भेटमा उक्त टोलीका नेतृत्व गरेका मन्त्री शाहले भने, ‘हामीले तपाईंलाई व्यक्तिका रुपमा होइन, सर्वाधिक मत ल्याएर जितेको एमालेको उपाध्यक्षका रुपमा लिएका छौं। पदले उपाध्यक्ष भएपनि राष्ट्रियताका मामलामा अहिले प्रमुख नेता हो तपाईं। त्यसैले आफ्नै मर्जीले राजीनामा गर्ने छुट छैन।’

यसैगरी, सुदूरपश्चिमका सांसदहरुले देशभक्ति आन्दोलनको खम्बा भएकाले प्रतिनिधि सभाबाट अलग्गिन नसक्ने बताएका थिए। उनीहरुको भनाइ थियो, ‘तपाईं प्रतिनिधि सभाबाट अलग भएर एमसीसीदेखि लिएर कालापानी, लिम्पियाधुरा र लिपुलेकका साथै नागरिकता विधेयकहरु बलियो हुन्छन् भन्ने विश्वास छैन। प्रतिनिधि सभामा गएर नै सामना गर्न सक्छौं।’

राष्ट्रभक्तिको राजनीति गरेको नेता कमजोर हुँदा देश कमजोर हुने महसुस गर्न पनि उनीहरुले आग्रह गरेका थिए। आफ्नो मात्रै नभइ सुदूरपश्चिमको सरकार, पार्टी र संसदका साथै राष्ट्रिय चिन्ता रहेको उनीहरुले बताएका थिए।

रावलको जवाफ– एकतामा लागेको मान्छेले कसरी मतदान गर्ने?
वरिष्ठ नेता नेपाल र सुदूरपश्चिम प्रदेशका नेताहरुको कुरा सुनेपछि प्रतिक्रियामा रावलले नेपालप्रति पनि गुनासो पोखे। नेपाललाई लक्षित गर्दै उनले भने, ‘मैले एकताका लागि पहल गरें। तपाईंले धन्यवाद दिनुपर्थ्याे। मलाई एकताका लागि भनेर पठाउने र उता एकता भाँड्ने काम भए। मलाई दुःख लाग्यो।’

मूल्यहीन राजनीतिको गोलचक्करमा फस्नुभन्दा आफूलाई नै समर्पण गर्नु उत्तम ठानेर राजीनामा गरेको उनले जवाफमा बताएका थिए। उनको भनाइ थियो– 'एकतामा सक्रिय भएको मान्छेले विश्वासको मत कसरी दिने?’

आफू अन्य १० नेताजस्तो तटस्थ पनि बस्न नहुने मान्यतामा रहेको उनले खोलेका छन्। उनले नेपालसमक्ष भने, ‘मतदान नगरेर तटस्थ बस्ने राजनीतिको कुनै मत हुँदैन। कि त मतदान गर्ने कि अस्वीकार गर्ने हो। तटस्थ मित्रहरुबीच गरिने राजनीति होइन।’

आफूलाई राजीनामा फिर्ता लिन दिइएको दबाबलाई लिएर एकपल्ट फेरि सोच्ने उनले बताएका छन्। ‘तपाईंहरु जस्तो शुभचिन्तक, सहयोद्धा र नेता कार्यकर्ताले आग्रह गर्नभएको छ। म यसबारे विचार गर्छु,’ उनले भने।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।