काठमाडौं– प्रहरी प्रधान कार्यालयले शान्ति मिशनका लागि आन्तरिक रुपमा लिएको प्रि–स्याट परीक्षाको प्रश्नपत्र ‘लिक’ प्रकरणको अनुसन्धान गरेको समितिले १ सय १९ जना परीक्षार्थीसँग परीक्षा अगावै प्रश्नपत्र पुगेको निष्कर्ष निकालेको छ।
प्रहरी नायव महानिरीक्षक वसन्त लामा नेतृत्वको छानबिन समितिले एक साता लगाएर गरेको अनुसन्धानमा प्रहरी मुख्यालयको युएन शाखाबाट चोरी भएको प्रश्नपत्र एक व्यक्तिबाट अर्को हुँदै १ सय १९ परीक्षार्थीसँग परीक्षा अगावै पुगेको निष्कर्ष निकालेको हो। बुधबार बिहान प्रहरी महानिरीक्षक शैलेश थापा क्षेत्रीसमक्ष समितिले ५५० पृष्ठ लामो छानबिन प्रतिवेदन बुझाएको छ।
प्रतिवेदनमा युएन शाखाका परिचर सुरेश बमले चोरी गरेको प्रि–स्याटको प्रश्नपत्र परीक्षा अगावै १ सय १९ जनासम्म पुगेको उल्लेख भएको समितिका एक सदस्यले नेपाल लाइभलाई जानकारी दिए। साउन १५ र १६ गते लिइएका चारवटै सिफ्टका प्रश्नपत्र परीक्षा अगावै १ सय १९ जनासँग पुगेको समितिले निष्कर्ष निकालेको छ।
चारवटै सिफट्का परीक्षाका प्रश्नपत्र बाहिरिएको निष्कर्ष निकालेपछि पुन: परीक्षा गर्नुपर्ने सिफारिस समितिले गरेको छ।
को-को परे कारबाहीमा?
भाइबर, म्यासेन्जर, ह्वाट्सएप लगायत विभिन्न सामाजिक सञ्जाल र व्यक्तिलाई भेटेर प्रश्नपत्रसमते दिइएको गरी १ सय १९ जनासँग प्रश्नपत्र पुगेको निष्कर्ष निकालेको समितिले ३५ जनासँग बयान लिएको थियो। १ सय १९ मध्ये ३५ जना पहिलो सिनमा देखिएको भन्दै समितिले उनीहरुसँग बयान लिएको थियो।
जस क्रममा ३५ जना मध्ये २४ जनालाई भने सामान्य सचेत मात्रै गराइएको छ। उनीहरुलाई यस्ता घटना हुँदा बेलैमा जानकारी गराउनु पर्नेमा नगराएकाले सचेतसम्म गराइएको प्रतिवेदनमा उल्लेख गरिएको छ। ३५ जना मध्ये बाँकी ११ जनालाई भने विभागीय कारबाहीदेखि बर्खास्तसम्मका लागि सिफारिस गरिएको प्रहरी प्रधान कार्यालय स्रोतले नेपाल लाइभलाई जानकारी दियो।
समितिले प्रश्नपत्र चोरी प्रकरणमा प्रत्यक्ष संलग्न भएको भन्दै तीन जनालाई सेवाबाट बर्खास्तीका लागि सिफारिस गरेको छ। जसमा युएन शाखामै कार्यरत रहेका परिचर सुरेश बम, साइबर ब्यूरोमा कार्यरत हवल्दार कुमार शाह र सई जनक थापालाई बर्खास्त गर्न सिफारिस गरेको छ। उनीहरुलाई तत्काल निलम्बन गरी बर्खास्तीको प्रक्रिया अघि बढाउन सिफारिस गरिएको स्रोतले नेपाल लाइभलाई जानकारी दियो।
त्यसैगरी युएन शाखाका प्रमुख एसपी अनुपम शमशेर राणा, परीक्षा सञ्चालन समितिका एसपी वेद विष्ट, इन्सपेक्टर इश्वरी भण्डारीलाई पनि कारबाहीका लागि सिफारिस गरिएको छ। उनीहरुले आफ्नो जिम्मेवारी पूरा गर्न नसकेको निष्कर्ष समितिको छ।
त्यसैगरी परीक्षार्थीहरु डिएसपी रुपेश खड्का, डिएसपी सुगन्ध श्रेष्ठ, इन्सपेक्टर दिलिप क्षेत्री, सई केदार तिमल्सिना, सई सुनिल भण्डारी, सई केशव कार्की, असई अशोक कार्की, जवान सुनिता नेपालीलाई पनि विभागीय कारबाहीका लागि सिफारिस गरिएको स्रोतले नेपाल लाइभलाई जानकारी दियो।
उनीहरुले प्रश्नपत्र पाएपछि अरुलाई पठाएको समितिले निष्कर्ष निकालेको छ। काठमाडौंसँगै उपत्यका बाहिरका परीक्षा केन्द्रमासमेत प्रश्नपत्र पुगेपछि पुन: परीक्षा सञ्चालन गर्नुपर्ने समितिले सुझाव दिएको छ।
यसअघि पनि आर्थिक आर्जनकै लागि प्रश्नपत्र बाहिरिने घटना हुने गरेको समितिले निष्कर्ष निकालेको छ। हवल्दार शाह ८ वर्षसम्म युएन शाखामा कार्यरत रहेका बेला उनले यसअघि पनि प्रश्नपत्र चोरी गरि आउट गरेको समितिको निष्कर्ष छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
