हत्या गरिएका व्यवसायी।
काठमाडौं– मोरङमा दुई र ललितपुरमा एक जग्गा व्यापारीको हत्या घटनाको अनुसन्धानको क्रममा नयाँ–नयाँ पाटाहरु खुल्दै गएका छन्। व्यापारी हत्याको अनुसन्धान गरिरहेको जिल्ला प्रहरी कार्यालय मोरङ र मोरङ प्रहरीलाई अनुसन्धानमा सहयोग गरिरहेको महानगरीय अपराध महाशाखाको टोलीले हत्यामा हुनसक्ने सम्भावित विभिन्न पाटाहरुको अनुसन्धानको क्रममा नयाँ तथ्यहरु खुल्दै गएका हुन्।
तीन व्यवसायी राजेन्द्रकुमार श्रेष्ठ, शम्भु चौधरी र मोहन लिम्बूको हत्या आरोपमा तीन जनालाई पक्राउ गरेर मोरङ प्रहरीले शुक्रबार सार्वजनिक गरेको छ। श्रेष्ठ, चौधरी र लिम्बूको हत्या आरोपमा सिरहाको सिरहा नगरपालिका–२१ स्थायी घर भई काठमाडौंको बल्खु बस्ने ३१ वर्षीय अनिल मण्डल, मोरङको धनपालथान गाउँपालिका–७ कमलपुरका ६२ वर्षीय नासिर आलम र मोरङको जहदा गाउँपालिका–४ सिस्वनी घर भएका अमित साह भनिने दिनानाथ सोनारलाई प्रहरीले सार्वजनिक गरेको हो।
पक्राउ परेकाहरुबाट नयाँ नयाँ तथ्यहरु खुल्दै गएका प्रहरी बताउँछ।
गत माघ १२ र १३ गते मोरङको धनपालथान गाउँपालिका–७ स्थित उखुबारीमा २ जनाको शव फेला परेको थियो। उक्त शव सिरहा घर भई काठमाडौं बस्दै आएका शम्भु चौधरी र धरान घर भई भक्तपुर बस्दै आएका ३९ वर्षीय राजेन्द्रकुमार श्रेष्ठको भएको खुलेको थियो।
उखु काट्न गएका किसानले भर्खर खनेजस्तो खाल्डो र बाहिर रगत देखेपछि प्रहरी कन्ट्रोल नम्बर १०० मा फोन गरेर जानकारी गराएका थिए। त्यसपछि मोरङका एसपी जनार्दन जिसीसहितको टोली गएर खाल्डो उत्खनन् गर्दा चौधरीको शव भेटिएको थियो। शवमा हात डोरीले बाँधिएको र घाँटीमा समेत डोरीको डाम थियो।
भोलिपल्ट अर्को खाल्डो खनेर हेर्दा श्रेष्ठको शव भेटिएको थियो। उक्त खाल्डोबाट मोबाइलको सीमकार्ड, पर्स, सवारी चालक प्रमाणपत्र समेत फेला परेको थियो। करिब २० मिटरको दूरीमा रहेका दुई खाल्डाबाट प्रहरीले दुई शव निकालेको थियो। दुवैलाई एउटै प्रकृतिबाट हत्या गरी खाल्डोमा गाडेको प्रहरी अनुसन्धानबाट खुलेको थियो। शव गलाउन नुनको समेत प्रयोग गरिएको थियो।
ग्राहक खोजिदिएवापत कमिसन लिने गरेका मण्डलबाट तीन जनाको हत्या
हत्या गरिएका राजेन्द्र र हाल पक्राउ परेका मण्डल मिल्ने साथी थिए। राजेन्द्र घरजग्गाको काम गर्थे भने मण्डल त्यसका लागि ग्राहक खोजिदिने काम गर्थे। ग्राहक खोजिदिएवापत उनले केही रकम कमिसन लिन्थे। एक अनुसन्धान अधिकृत भन्छन्, ‘मण्डल राजेन्द्रका बडिगार्ड जस्ता थिए। जहाँ जाँदा पनि राजेन्द्रले उनलाई छुटाउँदैनथे।’
अनि, राजेन्द्रको दोस्ती थियो मोहनसँग। ‘राजेन्द्र मोटरसाइकल चलाउँथे। मोहन पछि बस्थे। उनीहरु व्यवासायिक साझेदार समेत भएकाले प्रायः सँगै हुन्थे। गाडी लिएर जानुपर्ने ठाउँमा गाडी भाडामा लिएर राजेन्द्र आफैं चलाउँथे। मोहन उनीसँगै गाडीमा बस्थे’ ती अनुसन्धान अधिकृतले नेपाल लाइभलाई सुनाए, ‘यसरी राजेन्द्रका पार्टनर मोहनसँग मण्डलको चिनजान भएको देखिन्छ।’
अर्कोतर्फ मोहनका अर्का मिल्ने साथी थिए मोरङमै मृत भेटिएका शम्भु चौधरी। राजेन्द्रसँको जस्तै दोस्ती शम्भुसँग पनि थियो मोहनको। मोहनमार्फत नै मण्डल शम्भुसँग जोडिएका थिए। राजेन्द्रमार्फत उनका व्यावसायिक पार्टनर मोहन र शम्भुसँग समेत मण्डलको चिनजान र राम्रो सम्बन्ध बढेको थियो।
सिमेन्ट, हाइड्रोपावर र घरजग्गाको कारोबारी तीन व्यवसायीको सम्पूर्ण आर्थिक पाटोको बारेमा मण्डल जानकार भइसकेका थिए। त्यसपछि उनीहरुको हत्या गरेर आर्थिक लाभ लिने उद्देश्यले उनले तीन जनाको हत्या योजना बनाएको देखिएको प्रहरी स्रोतले नेपाल लाइभलाई जानकारी दियो। त्यसका लागि उनले भारतीय नागरिकलाई 'सुपारी दिएर' तीन व्यवसायीको हत्या गरेको प्रहरीको अहिलेसम्मको अनुसन्धानले देखाएको छ।
साढे २ अर्बको तमसुक, पैसा लिन बोलाएर हत्या?
हत्याको मुख्य योजनाकार भनिएका मण्डलले मोहनलाई साढे २ अर्ब दिनपुर्ने भन्ने उल्लेख भएको तमसुक समेत प्रहरीले बरामद गरेको छ। उक्त तमसुक बिहीबार मोहनको लास उत्खनन् गर्दा फेला परेको हो। ‘तमसुक नक्कली बनाएको हुनसक्ने हाम्रो आशंका छ’ अनुसन्धान अधिकृत भन्छन्, ‘त्यही तमसुकको आधारमा रकम दिने भनेर बोलाएर हत्या भएको हुनसक्ने देखिन्छ।
तमसुकमा उल्लेख भएअनुसार रकम मोहनलाई दिने भनेर भाडामा लिएको घरमा बोलाएर मण्डलले हत्या गरेको प्रहरीको अहिलेसम्मको अनुसन्धानले देखाएको छ। त्यसपछि मोहनलाई दिनुपर्ने रकम मोहन नभेटिएको र मोरङतिर गएको हुनसक्ने भन्दै राजेन्द्र र शम्भुलाई मोरङ पुर्याएर हत्या गरिएको प्रहरी अनुसन्धानले देखाएको छ।
ललितपुरमा मोहनको हत्या, खोज्न भन्दै मोरङ पुर्याइएका दुई व्यवसायी मारिए
प्रहरी अनुसन्धान अनुसार मोहनको हत्या गत मंसिर २८ गते भएको खुलेको छ। उनको हत्या गर्न मण्डलले एउटा घर नै भाडामा लिएका थिए। सामाजिक सञ्जाल फेसबुकमा घर भाडामा रहेको जानकारी पाएपछि मण्डलले उक्त घर मासिक ३० हजार रुपैयाँ तिर्नेगरी भाडामा लिएका थिए। त्यसपछि मोहनलाई उक्त घरमा बोलाएर मण्डलले हत्या गरेको खुलेको छ।
नाइलनको डोरीले घाँटी कसेर हत्या गरेपछि मण्डलको शव घरकै कम्पाउण्डमा खाल्डो खनेर गाडिएको अवस्थामा बिहीबार प्रहरीले उत्खनन् गरेको थियो। ‘सुरुमा मण्डलले घरभित्रै शव गाड्ने प्रयास गरेछन्। घरभित्रको सिमेन्टको ढलान फोड्न नसकेपछि उनले बाहिर करिब ५ फिटको खाल्डो खनेर शव गाडेको अवस्थामा भेटियो’, एक अनुसन्धान अधिकृतले भने, ‘खाल्डो खनेर शव गाडेपछि माथिबाट ढलान समेत गरिएको थियो।’
हत्या आरोपमा पक्राउ परेका अनिल मण्डल, नासिर आलम र अमित साह भनिने दिनानाथ सोनार।
मण्डल पक्राउ परेपछि उनैले दिएको बयान तथा सूचनाका आधारमा प्रहरीले उत्खनन् गर्दा मोहनको शव भेटिएको हो। काठमाडौंमा पक्राउ परेका मण्डललाई बिहीबार मात्रै हवाईजहाजमार्फत मोरङ पठाइएको थियो। मोरङ पुगेपछि उनले आफ्नो अपराध स्वीकार्दै मोहनको शव गाडेको ठाउँ प्रहरीलाई भनेका थिए।
यता, ललितपुरमा मंसिर २८ गते मोहनको हत्या गरेपछि उनलाई खोज्न भन्दै राजेन्द्र र शम्भुलाई मण्डलले मोरङ पुर्याएका थिए। प्रहरी स्रोतका अनुसार एउटा गाडी रिजर्भ गरेर तीनै जना मोरङ गएका थिए। त्यसपछि मण्डलले योजनाअनुसार उनीहरुलाई केही दिन मोहन आउनसक्ने भन्दै भुलाएका थिए। त्यसपछि भारतीयको सहयोगमा राजेन्द्र र शम्भुलाई मोहनकै शैलीमा मारेर गाडेको प्रहरी अधिकारी बताउँछन्।
अभियुक्त ठानिएका व्यक्तिकै हत्या, मोबाइल लोकेसनले खोल्यो पोल
दुई जना मृत भेटिएपछि प्रहरीले परिवारमार्फत उनीहरुको काम, पृष्ठभूमि पत्ता लगाएको थियो। त्यसपछि खुल्यो, उनीहरुसहित थप दुई जना (मण्डल र मोहन) मिलेर गर्दै आएको व्यावसायिक कारोबार।
चार जना व्यावसायिक साझेदारमध्ये दुई जना मृत भेटिएपछि प्रहरीले बाँकी रहेका दुई साझेदार मण्डल र लिम्बुमाथि अनुसन्धान सुरु गरेको थियो। उनीहरु दुवैजना अभियुक्त हुनसक्ने प्रहरीको प्रारम्भिक अनुसन्धान थियो। प्रहरीले खोजी गरेकामध्ये मोहनको मोबाइल अफ थियो। अनिलको भने अन भएकाले लोकेसन काठमाडौं नै देखाएको थियो। त्यसपछि मोरङबाट डीएसपी मन्जिल मुकारुङसहितको टोली अनुसन्धानका लागि काठमाडौं आएको थियो।
महानगरीय अपराध महाशाखा समेतको सहयोगमा मण्डल चार दिनअघि काठमाडौंबाट पक्राउ परे। तीन दिनसम्म काठमाडौंमा राखेर अनुसन्धान गर्दा समेत मण्डलले अपराध स्वीकार गरेनन्। मोरङ पुर्याएपछि भने उनले प्रहरीलाई ढाँट्न सकेनन्। त्यहाँ उनका अपराधका साक्षी तथा सहयोगी मोरङको जहदा गाउँपालिका–४ सिस्वनी घर भएका अमित साह भनिने दिनानाथ सोनार र मोरङको धनपालथान गाउँपालिका–७ कमलपुरका ६२ वर्षीय नासिर आलमलाई पक्राउ गरेर प्रहरीले राखिसकेको थियो।
त्यसपछि उनले अपराध स्वीकार गर्दै प्रहरीले खोजी गरेका अर्का व्यक्ति मोहनको पनि हत्या गरी गाडेको बयान दिएका थिए। त्यसपछि प्रहरीले अभियुक्त भनेर सोचेका मोहनकै हत्या भएको खुलेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
copy-1751969157.jpg)
-1751879619.webp)
-1749826086.png)
