काठमाडौं– जाम्बियन नागरिक कपुतुला अबिसर्ग विगत दुई वर्षदेखि प्रेममा थिइन्। ३५ वर्षीया कपुतुलाका प्रेमी दक्षिण अफ्रिका बस्थे। आफ्ना प्रेमीसँग भेटघाट गर्न उनी बेला–बेलामा दक्षिण अफ्रिका र जाम्बिया ओहोर–दोहोर गर्थिन्।
‘कपुतुलाको पासपोर्टबाट उनी दक्षिण अफ्रिका–जाम्बिया ओहोर–दोहोर गरेको पुष्टि हुन्छ,’ प्रहरीको लागुऔषध नियन्त्रण ब्यूरोका प्रहरी उपरीक्षक (एसपी) जीवनकुमार श्रेष्ठ भन्छन्, ‘यसबारे बुझ्दा उनले आफ्ना प्रेमी दक्षिण अफ्रिकामा रहेको बताएकी छिन्।’
विवाह गरेर सन्तान जन्माइसकेकी कपुतुला दक्षिण अफ्रिका बस्ने जाम्बियन नागरिकको प्रेममा थिइन्। उनी दक्षिण अफ्रिका गएर प्रेमीसँगै केही दिन बिताउँथिन्, फेरि फर्केर जाम्बिया आउँथिन्। जाम्बियामा उनको स्नातक तहको पढाइ चलिरहेको थियो। दक्षिण अफ्रिका घुमिरहेका बेला एक दिन उनका प्रेमीले नेपाल घुम्न जाने प्रस्ताव राखे। उनले पनि आफ्नो प्रेमीको प्रस्तावमा सहमति जनाइन्। त्यसपछि उनी जाम्बिया फर्किन्। त्यसको केही समयपछि पुनः आफ्नो नेपाल घुम्न आउने योजनासहित आफ्ना प्रेमी भेट्न दक्षिण अफ्रिकाको यात्रामा निस्किन्।
सुरुमा कपुतुला एक्लै नेपाल जाने र त्यसको तीन दिनपछि आफू आउने र सँगै घुम्ने योजना प्रेमीले कपुतुलालाई सुनाए। प्रेमीको योजनाअनुसार उनी एक्लै नेपाल आउन तयार भइन्। मे ३ मा दक्षिण अफ्रिका फर्कने टिकट र लाजिम्पाटस्थित एक होटलमा कोठा समेत बुक भयो। सुटकेसमा प्रेमीले सामान प्याक गरे। सुटेकशभित्र फल्स बटम बनाइ दुई वटा लेडिज झोलाभित्र तीन वटा प्लाष्टिकको पोका राखियो। ‘यो सामान लिन एक महिला आउँछिन्। यो उनको तस्बिर हो। सामान उनैलाई दिनु’ आफ्ना प्रेमीले हिँड्ने बेला भनेको कुरा कुपुतुलाले प्रहरीसमक्ष बताइन्।
यसअघि पनि साउथ अफ्रिकाबाट खाडीका देश हुँदै नेपाल आउने व्यक्तिबाट लागुऔषध बरामद भएकाले प्रहरीले कपुतुलाको यात्रामा सुरुवाती संका गरेको थियो। त्यसमा पुष्टि हुने थप सूचना आएपछि राहदानी नम्बर जेटएन–८४०१३१ कि कपुतुला लागुऔषध नियन्त्रण ब्यूरोको उच्च निगरानीमा परेकी थिइन्।
२४ घण्टा कुरेर भारतीय भरिया पक्राउ
विमानस्थलबाट बाहिरिएपछि दक्षिण अफ्रिकाबाटै बुक भएको लाजिम्पाटस्थित होटलमा पुगिन् कपुतुला। ‘कपुतुलाले सुटकेसमा ठूलो मात्रामा सेतो हेरोइन ल्याएको सूचना पहिल्यै पाए पनि यसमा संलग्न थप व्यक्तिहरुको पहिचान गरी पक्राउ गर्नुपर्ने भएकाले हामीले उनलाई होटलसम्म पुग्न दियौं,’ एक अनुसन्धान अधिकारीले भने, ‘होटल पुगेको २४ घण्टासम्म कुरेपछि अर्को भरिया पक्राउ गर्न सफल भइयो।’
कुपुतुलाले ल्याएको सामान लिन आएकी भारतीय नागरिक ३५ वर्षकै केइफाङ मिजोरमलाई एक दिनसम्म कुरेर ब्यूरोले पक्राउ गर्यो। उनी वैशाख ५ गते राति ८ बजे उक्त सुटकेसको सामान लिन लाजिम्पाटस्थित एक होटलमा पुगेकी थिइन्।
डेढ लाखमा भरिया, गन्तव्य भारत
अहिलेसम्मको प्रहरी अनुसन्धानबाट खुलेअनुसार कपुतुलालाई उनका दक्षिण अफ्रिका बस्ने जाम्बियन युवकले प्रेमको नाटक गरेर सेतो हेरोइनको भरिया बनाएर नेपाल पठाएको खुलेको छ। सेतो हेरोइनको बारेमा आफूलाई जानकारी नै नदिइ प्रेमीले सामान बोकाएर पठाएको कपुतुलाको दाबी छ। ‘सामान फलानो मान्छेलाई दिनु भनेपछि कपुतुलाले त्यसमा शंका गरेर के–कस्तो सामान भन्ने बुझ्नुपर्थ्यो। त्यो केही नबुझी सामान बोकेकाले कपुतुलाले भनेजस्तो केही थाहै नभएको हुन पनि सक्छ,’ ब्यूरोका एक अधिकारीले भने, ‘तर यसमा भरिया भएर सात किलो कोकिन बोकेवापत उनले केही रकम भने पाएको देखिँदैन।’
प्रेमको नाटक गरेर दक्षिण अफ्रिकादेखि नेपालसम्म सेतो हेरोइन ल्याउन सफल भएपनि नेपालबाट गन्तव्य भारत पुर्याउन भने डेढ लाख रुपैयाँ भारु दिने सहमति भएको अनुसन्धानबाट खुलेको छ। डेढ लाख रुपैयाँ पाउने भएपछि केइफाङ हेरोइन लिन दिल्लीबाट हवाई मार्ग हुँदै काठमाडौं आएकी थिइन्। उनको फर्कने रुट पनि हवाई मार्ग नै रहेको पाएको छ। तर, हेरोइन रिसिभ गर्दागर्दै उनी पक्राउ परिन्।
भारतीय महिला केइफाङ यसअघि पनि लागुऔषध आसोरपसारमा संलग्न रहेको खुलेको छ। कतिसम्म भने उनी आफैं भारतबाट दक्षिण अफ्रिकासम्म पुगेर लागुऔषध ल्याएको ब्यूरोको डीएसपी फणिन्द्र प्रसाईंले बताए। उनी होटलमा वेटरको काम गर्ने महिला हुन्।
इन्टरपोलको सहयोगमा अनुसन्धान, थप ३ जनाको पहिचान
यति ठूलो मात्रामा अफ्रिकाबाट सेतो हेरोइन काठमाडौं भित्र्याइएको पहिलो घटना हो। ठूलो मात्रामा हेरोइनसहित विदेशी नागरिक पक्राउ परेपछि थप अनुसन्धानमा ब्यूरो जुटेको छ। अन्तराष्ट्रिय प्रहरी संगठन (इन्टरपोल)को सहयतामा समेत यो घटनाको अनुसन्धान भइरहेको ब्यूरो स्रोतले जनाएको छ।
अनुसन्धानको क्रममा प्रेमी बनेर दक्षिण अफ्रिकाबाट हेरोइन पठाउने व्यक्तिले यसअघि पनि पटक–पटक अन्य देशमा हेरोइन पठाएको खुलेको छ। उनैले पठाएको हेरोइनसहित केही दिनअघि मात्रै भारतमा केही मान्छे पक्राउ परेका पाइएको ब्यूरोका एक अधिकारीले बताए।
सात किलो सेतो हेरोइनको अनुसन्धानको क्रममा कुपुतुलाको प्रेमीसँगै भारतमा रहेका अर्का एक भारतीय नागरिक पनि संलग्न रहेको खुलेको छ। त्यस्तै, जाम्बियामा रहेका एक व्यक्तिको नेक्सस पनि सात किलो सेतो हेरोइनमा जोडिएको ब्यूरो स्रोतले जनाएको छ। उनीहरुमाथि इन्टरपोलको सहयतामा थप प्रक्रिया अघि बढाइने ब्यूरोले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
copy-1751969157.jpg)
-1751879619.webp)
-1749826086.png)
