काठमाडौं– शुक्रबार भएको स्थानीय तहको निर्वाचनमा अधिकांश मतदान केन्द्रलाई निर्वाचन आयोगले ज्येष्ठ नागरिक, अपांग र अशक्तमैत्री बनाएको थियो। तर मतदान गर्नका लागि आयोगले पर्याप्त शिक्षा नदिएकोले मत बदर हुने सम्भावना रहेको मतदाताहरुको भनाइ छ।
नेपाल लाइभले केही मतदान स्थलमा पुगेर केही ज्येष्ठ नागरिक र अपांगहरूसँग संवाद गरेको थियो। तीमध्ये एक हुन्, ललितपुर महानगरपालिका- ३ निवासी ८६ बर्षीया ज्ञानी महर्जन। धोबिघाट मतदान केन्द्रबाट सहज तरिकाले आफ्नो मताधिकार प्रयोग गर्न पाउँदा ज्ञानी खुसी थिइन्।
छोरी र नातीको सहयोगमा महर्जन मतदान केन्द्र आइपुगेकी थिइन्। उनले मतदान केन्द्रमा कुनै झन्झट बेहोर्नु परेन। नेपाल लाइभसँग कुरा गर्दै उनले भनिन्, ‘मतदान केन्द्रमा ज्येष्ठ नागरिकलाई बेग्लै बाटो बनाइदिएकोले मैले सहजै मतदान गरेँ।’
तर, मतपत्र ठूलो रहेकाले चुनाव चिह्न पहिचान गर्न आफूलाई केही अप्ठ्यारो परेको उनले बताइन्। उनलाई मतदान गर्न छोरीले सहयोग गरेकी थिइन्।
त्यस्तै, सोही केन्द्रमा आफ्नो मत जाहेर गर्न आइपुगेकी ७७ बर्षीया कृष्णमाया श्रेष्ठले पनि मतदान केन्द्र ज्येष्ठ नागरिकमैत्री रहेकोले मतदान गर्न सजिलो रहेको बताइन्। घरबाट छिमेकीसँग आएको र उत्साहजनक रुपमा मतदान गरेको उनले बताइन्। उनले मतपत्र भने झन्झटिलो रहेको गुनासो गरिन्।
श्रेष्ठलाई आफूले रोजेको उम्मेदवारलाई मत दिनका लागि मतपत्रमा निकै बेर चिह्न खोज्नुपर्यो। भन्छिन्, ‘मतपत्र ज्यादै लामो भएकोले चिह्न खोज्न समय लाग्ने रहेछ। मत नै बदर हुने हो कि भन्ने चिन्ता लागेको छ।’
तर उनी आफूले जाहेर गरेको मत बदर नहुनेमा ढुक्क पनि सुनिइन्।
उक्त केन्द्रमा खटिएका एक सुरक्षाकर्मीले ज्येष्ठ नागरिक र अपांगलाई मतदान गर्न सहज वातावरण बनाइएको बताए। जसकारण ज्येष्ठ नागरिक र अपाङ्गता भएका व्यक्तिले सहजै र छिटो मतदान गर्न पाएको उनले सुनाए।
भक्तपुर नगरपालिका-१ को मतदान केन्द्र रहेको भक्तपुर बहुमुखी क्याम्पसमा मत जाहेर गर्न पुग्ने ज्येष्ठ नागरिक, अपांग तथा अशक्तलाई पनि सहज बनाइएको थियो।
घरबाट बिहानको काम सकेर खाना खाइवरी मतदान गर्न आएका बाबुकाजी धाैबन्जार, ७५, लाई मतदान गर्न एकदमै कम समय लाग्यो। उनले आफू ज्येष्ठ नागरिक भएकाले छिट्टै पालो आएको बताए।
तर उनी पनि मतपत्र लामो भएकाले मत हाल्न जटिल भएकाे भने स्वीकार गर्छन्। त्यस्तै, राम्रोसँग मतदान शिक्षा नपाएकाले आफ्नो मत बदर भयो कि भन्ने चिन्ता उनलाई छ।
त्यस्तै, ९१ वर्षीया कुलीकुली वैद्य पनि परिवारको सहयोगमा ह्विलचेयर चढेर मतदान केन्द्र आइपुगिन्। उनी पनि आफ्नो मत जाहेर गर्न समय नलागेकोमा खुसी थिइन्। उनलाई मत हाल्न उनको छोराले सहयोग गरेका थिए।
कुलीकुलीसँगै आएकी थिइन् उनकी छिमेकी ७९ वर्षीया कृष्णकुमारी मर्हजन। उनी लामो समयदेखि ह्विलचेयरको सहयोगमा हिँड्ने डुल्ने गर्छिन्। उनी नातिको सहयोगमा मतदान केन्द्रमा आएकी हुन्। उनले यसरी मतदान गर्न आएको पाँचौँ पटक हो।
उनलाई अहिलेको मतपत्र लामो र जटिल रहेकोले नातीसँग मतपत्रमा मत हाल्न नसकेकोमा थकथकी लागेको छ। तर मतदान केन्द्रका कर्मचारीको सहयोगमा उनले मतदान गरेको बताइन्।
काठमाडौं महानगरपालिका- ३१ का ८२ बर्षीया केदार अमात्य यसपटकको मतदान केन्द्रको व्यवस्थापन देखेर दंग छन्। बानेश्वरको मीनभवन क्याम्पस केन्द्रमा मत हाल्न आएका उनले बिना झन्झट मत हालेको बताए। तर उनलाई पनि मतपत्र 'बहुरंगी' लागेको छ। यति धेरै चिह्नहरु रहेकोले पर्याप्त मतदान शिक्षा चलाउनुपर्नेमा आयोग चुकेको उनको मूल्यांकन छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
