काठमाडाैं-स्थानीय तह निर्वाचनमा उम्मेदवार बन्नुअघि २१ वर्षीय वशिष्टकुमार कलवार भारतको पटनाबाट बीबीए पढ्दै थिए। विद्यार्थी हुँदा उनका योजना अर्कै थिए। तर अब उनका योजना बदलिएका छन्। निर्वाचनमा जनता समाजवादी पार्टीको तर्फबाट पर्साको कालिकामाई गाउँपालिका अध्यक्षमा निर्वाचित भएपछि उनी गाउँको मुहार फेर्ने योजनामा छन्।
युवा भएको नाताले पनि गाउँलाई प्रविधिमैत्री बनाउने उनको सपना छ। उनको ध्यान गाउँका आधारभूत आवश्यकता पूर्ति गर्नेतर्फ छ। भन्छन्, ‘मैले बनाएको योजनाकै आधारमा जनताले मत दिएर जिताएका हुन्। पुरानो नेतृत्वले गरेजस्तो गाउँलाई अविकसित छाड्दिन।’
उनले आफ्नो प्राथमिकता पनि सुनाए। मुख्यत शिक्षा, स्वास्थ्य, गुणस्तरीय खानेपानी र प्रणालीलाई प्रविधिमैत्री बनाउने योजना रहेको उनी बताउँछन्। ‘पालिकामा एउटै गुणस्तरीय शिक्षा दिने उच्च मावि छैनन्, पहिलो काम उच्च मावि निर्माण गर्नेहुनेछ,’ उनी भन्छन्, ‘गुणस्तरीय पिउने पानीको प्रबन्ध, उच्च प्रविधियुक्त स्वास्थ्य संस्था र आधुनिक प्रविधिमैत्री प्रणालीको माध्यमबाट सेवा प्रवाह गर्ने मेरो लक्ष्य रहेको छ।’
अधिकांश नेतृत्व पाका उमेरका रहेको अवस्थामा उनको ‘इन्ट्री’ ले सबैको ध्यान खिचेको छ। उनले नेपाली कांग्रेसका तर्फबाट ४२ वर्षीय उम्मेदवार अजयकुमारलाई ११७ मतअन्तरले पराजित गरेका हुन्।
कलवार आफू कुशलतापूर्वक यो जिम्मेवारी पूरा गर्ने बताउँछन्। नेपाल लाइभसँगको कुराकानीमा उनले आफूसँग प्रष्ट लक्ष्य रहेकाले पालिकालाई विगतको नेतृत्वले गरेजस्तो पछ्यौटेपनमा नछोड्ने दाबी गरे।
आफ्नो गाउँमा विकासका दृष्टिले पछाडि पर्नुमा विगतमा कांग्रेसको नेतृत्व मुख्य कारक रहेको आरोप पनि उनले लगाए। ‘२५ वर्षदेखि कांग्रेसीहरूले राज गरे। तर गाउँ विकासमा कुनै काम गरेनन्, भ्रष्टाचारमात्र गरे’ उनी भन्छन्, ‘अब बल्ल युवाले नेतृत्व पाएको छ, म यो पलिकालाई उन्नत बनाउँछु।’
आफूमाथि युवाहरूको भरोसा रहेकाले उनीहरूसँग रायसल्लाह लिएर काम गर्ने र आफ्ना लागि सबै समान रहेकाले सबैलाई समेट्ने उनी बताउँछन्। भन्छन्, ‘म युवाहरूका लागि आशा गरिएको मान्छे हुँ। उनीहरूसँग सल्लाहसुझाव लिएर काम गर्छु। र, सबै नागरिकलाई कुनै राजनीतिक दलगत दृष्टिले हेर्दिन। मेरा लागि सबै समान हुनेछन्।’
त्यसो त उनीमाथि पारिवारिक विरासतबाट पालिका अध्यक्षको टिकट पाएको आरोप छ। उनकी आमा लालसादेवी कलवार जसपाकै स्थानीय नेता हुन् भने काका दिनेशप्रसाद कलवार जिल्ला तहका नेता हुन्। तर, उनी परिवारले भन्दा पनि आफ्नै सुझबुझले पालिका अध्यक्षमा उठेको बताउँछन्। उनी भन्छन्, ‘परिवार राजनीतिमै भएकाले त्यस्तो कुरा हुनु स्वाभाविक हो, तर मेरो क्षमतालाई पत्याएर मैले टिकट पाएको र त्यसमा जनताले साथ दिएको हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
