काठमाडौं– आइतबार बसेको नेकपा एकीकृत समाजवादीको केन्द्रीय सचिवालय बैठकले पार्टीको तर्फबाट सरकारमा सहभागी मन्त्रीलाई फिर्ता बोलाएर नयाँ पठाउने निर्णय गर्यो। यसको जानकारी आइतबार नै नेताहरूले प्रधानमन्त्रीलाई बुझाइसकेका थिए। तर, प्रधानमन्त्रीले शपथ गराएनन्। मन्त्रीहरूले नै दबाब दिएपछि शपथ रोकिएको चर्चा छ।
पार्टीले गरेको निर्णय प्रधानमन्त्रीले कार्यान्वयन नगरेपछि समाजवादीका नेताहरू रुष्ट बने। सोमबार बालुवाटारमा नै शीर्ष नेताहरूबीचको छलफलबाट तत्काल मन्त्री फेर्ने निर्णय थमौती भयो। संसद्मा बजेटमाथि मन्त्रालयगत छलफल चलिरहेकाले बजेट पास गरेर मात्रै मन्त्री हेरफेर गर्नेमा नेताहरूबीच भएको सहमतिले सहज भयो।
बुधबार काठमाडौंमा आयोजित पार्टीको कार्यक्रममा बोल्दै नेकपा एकीकृत समाजवादीका अध्यक्ष माधवकुमार नेपालले आफ्ना मन्त्रीहरू इमानदार भएको भन्दै पार्टीको निर्णय कार्यान्वयन हुने बताए। ‘सबै इमानदार हुनुहुन्छ। पार्टीको आदेश पालना गर्नुहुन्छ। आदेश पालना गरेर राम्रो कार्यकर्ताको रूपमा आफूलाई प्रस्तुत गर्नुहुन्छ भन्ने हामीलाई पूरै विश्वास छ’, उनले भने।
अध्यक्ष नेपालले पार्टीले निर्णय गरिसकेपछि लागू नभएको विषयमा प्रश्न उठिरहेको कुरामा आफ्नो पार्टीले निर्णय गर्दा अन्यत्र भूकम्प गएको बताए।
‘हाम्रो पार्टीले निर्णय गर्यो, अरु पार्टीमा पनि भूकम्प चल्यो होला। हाम्रोमा पनि गर्नुपर्यो भन्ने भएको होला। अरु पार्टीले हामीलाई पनि एक–दुई दिन सोच्नका लागि समय दिनुस् न त भनेका पनि होलान्’, उनले भने।
समाजवादीका अध्यक्ष नेपालले भने जस्तै नेकपा एकीकृत समाजवादीले मन्त्री हेरफेर गर्ने निर्णय गरेपछि त्यसको पराकम्पन अन्य दलमा पनि देखिएको छ। नेपाली कांग्रेस, नेकपा माओवादी केन्द्र र जसपाभित्र मन्त्री फेर्न दबाब बढेको नेताहरू नै बताउँछन्। यसको सबैभन्दा धेरै आन्तरिक दबाब नेकपा माओवादी भित्र देखिएको छ।
उसो त नेकपा माओवादी केन्द्रबाट अर्थमन्त्री बनेका जनार्दन शर्मालाई हटाउनुपर्ने दबाब बढेको थियो। अर्थतन्त्रको सुधार गर्न नसकेको भन्दै उनलाई हटाउनुपर्ने माग भएको थियो। सत्ताको नेतृत्व गरिरहेको दल नेपाली कांग्रेसभित्र कतिपय नेताहरूले अर्थमन्त्री फेर्नुपर्ने दबाब बढाएका थिए। तर, गठबन्धनको सरकार भएकाले त्यसमा प्रधानमन्त्री एक्लैले निर्णय गर्न सकेनन्।
अहिले स्थानीय तहको निर्वाचन सम्पन्न भइसकेर आगामी निर्वाचनको तयारी भइरहँदा दलभित्र मन्त्री हेरफेर हुनुपर्ने दबाब बढेको हो। अहिले मन्त्री भएर अबको निर्वाचनमा जान सकियो भने त्यसबाट आफ्नो जितका लागि सहज हुने नेताहरूको बुझाइले पनि पार्टीहरूभित्र मन्त्री हेरफेरको दबाब बढेको बताइएको छ।
नेकपा(माओवादी केन्द्र)का नेता वर्षमान पुन पार्टीभित्र मन्त्री फेर्ने आवाजहरू उठिरहेको बताउँछन्। बुधबार नयाँ बानेश्वरस्थित संसद् भवनमा सञ्चारकर्मीहरूलाई संक्षिप्त प्रतिक्रिया दिँदै नेता पुनले माओवादी पार्टीबाट सरकारमा मन्त्री बनेकाहरूलाई फेर्नुपर्ने आवाज उठिरहेको बताए।
‘नेकपा (एकीकृत समाजवादी) ले मन्त्रीहरू फेर्ने निर्णय गरेसँगै माओवादी केन्द्रलाई पनि मन्त्रीहरू फेर्न दबाब परेको छ,’ उनले भने, ‘तर, यसबारे पार्टीभित्र भने कुनै छलफल भइसकेको छैन। समाजवादीका साथीहरूले पुरै सेट फेरिसकेपछि हाम्रोमा पनि दबाब छ। कांग्रेसमा पनि दबाब छ । जसपामा दबाब छ। यो दबाबलाई नेताहरूले कति थेग्नुहुन्छ थाहा छैन।’
माओवादी केन्द्रभित्र यसअघि सरकारमा सहभागी हुनबाट रोकिएका नेताहरू अहिले मन्त्रीका लागि प्रतिस्पर्धामा देखिएका छन्। मातृका यादव, हरिबोल गजुरेल, शक्ति बस्नेत, चक्रपाणी खनाल, जयपुरी घर्ती, दुर्गाकुमारी विश्वकर्मा, धर्मशिला चापागाईं, अन्जना विशंखे लगायतका सांसदहरू मन्त्रीको प्रतिस्पर्धामा देखिएका हुन्।
‘गठबन्धनमा रहेको एउटा दलले पूरै टीम नयाँ पठाउँदै गर्दा हाम्रो पार्टीले पनि नयाँ अनुहारलाई काम गर्ने अवसर प्रदान गर्नुपर्छ,’ मन्त्रीका एक आकांक्षीले भने, ‘पार्टीमा कसैले धेरै अवसर पाउने र कसैले नपाउने हुनु हुँदैन।’
तर, माओवादी केन्द्रका नेता गिरिराजमणि पोखरेल संसद्मा मन्त्रालयगत छलफल प्रारम्भ भएको बेलामा मन्त्री फेर्न नमिल्ने बताउँछन्। ‘सरकारमा फेरबदल नै गर्नुपर्ने भए पनि, पहिलो त संयुक्त सरकार हो यो। संयन्त्र छ। आचारसंहिताहरू छन्। मन्त्रालयको छलफल प्रारम्भ गर्ने अनि मन्त्रीहरू बदल्छु भनेर कहीँ मिल्छ त्यो? त्यो संयुक्त सरकारको सोचसँग मेल खाएन’, उनले भने।
तर, नेकपा माओवादी केन्द्रमा मन्त्रीका लागि आकांक्षी भएकाले जति दबाब दिए पनि अध्यक्ष पुष्पकमल दाहाल‘प्रचण्ड’ले नचाहेसम्म कुनै हेरफेर हुने स्थिति देखिँदैन। माओवादी केन्द्रकै एक पूर्व स्थायी कमिटी सदस्य पनि यो कुरालाई स्वीकार गर्छन्।
‘अर्को पार्टीले हेरफेर गर्यो, हाम्रो पनि गर्नुपर्छ भन्ने त होला। तर, अध्यक्ष प्रचण्डले चाहे मात्रै हो परिवर्तन हुने, नत्र हुन सक्दैन,’ उनले भने, ‘उहाँलाई मन परेको मान्छे फेरिने कुरो हुँदैन। जो मन परेको छैन त्यही फेर्नु हुन्छ, त्यो उहाँले चाहे अनुसार हुने हो।’ उनी यसअघि मन्त्री हुन आकांक्षा राखेका केही नेताहरूले अध्यक्षलाई दबाब दिइरहेको बताउँछन्।
पूर्व स्थायी कमिटी सदस्य गणेश शाह अहिलेसम्म मन्त्री फेर्ने विषयमा पार्टीभित्र अनौपचारिक र औपचारिक रूपमा कुनै छलफल नभएको बताउँछन्। ‘अरु पार्टीले फेर्ने निर्णय गर्दा हाम्रो पार्टीमा पनि फेरिए हुन्थ्यो भन्ने कसैलाई लागेको होला,’ उनले भने, ‘त्यसबारे पार्टीभित्र छलफल चलेको छैन।’
जनता समाजवादी पार्टीभित्र पनि अहिले सरकारमा सहभागी भएका नेताहरूलाई फिर्ता बोलाएर नयाँ पठाउन दबाब बढेको छ। एकीकृत समाजवादीको निर्णयपछि मन्त्री बन्ने आकांक्षीहरूले छुट्टै भेला नै गरेर दबाब बढाएका थिए। यसअघि पनि सरकारमा मन्त्रीहरू पठाउन निकै सकस बेहोरेको जसपाभित्र अहिले हेरफेर गर्ने विषयले झनै दबाब बढाएको छ।
नेपाली कांग्रेसका एक सांसद पनि सत्ता साझेदार दलले मन्त्री हेरफेर गरेमा कांग्रेसले पनि नयाँ अनुहार पठाउनुपर्ने बताउँछन्। ‘हाम्रो पार्टीभित्र अहिले नै मन्त्री फेर्न विषयमा कुराकानी त भइसकेको छैन,’ उनले भने, ‘तर, सरकारमा सहभागी रहेका अन्य दलबाट मन्त्री हेरफेर गर्दैगर्दा हाम्रोमा पनि त्यो दबाब बढ्छ नै त्यसमा नेतृत्वले ध्यान दिन्छ होला।’
तर, नेपाली कांग्रेसका प्रवक्ता डा. प्रकाशशरण महत भने अहिले आफ्नो पार्टीबाट सरकारमा सहभागी भएका मन्त्रीहरू हेरफेरको कुनै विषय नै नउठेको बताउँछन्। ‘अन्य पार्टीले हेरफेर गर्यो भनेर हाम्रो पनि गर्नुपर्छ भन्ने होइन,’ उनले भने, ‘अहिले यो विषयमा न कुनै छलफल भएको छ न केही।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879506.png)
-1751793737.png)
-1749826086.png)
