काठमाडौं– ‘जब चुनाव आउँछ दार्चुला आउँछन् अनी तुइनबाट मरेको वा अर्को दुर्घटनामा परेर सहिद भएकोहरुलाई सम्झेर गोहीको आँसु झार्छन्। सक्कली आंसु हैन त्यो,’ एमाले अध्यक्ष केपी शर्मा ओलीलाई लक्षित गर्दै माओवादी केन्द्रका अध्यक्ष पुष्पकमल दाहाल प्रचण्डले दार्चुलको चुनावी सभामा भने ‘तपाईहरु कोही भ्रममा नपर्नु होला। केपी ओलीले हैन नयाँ नक्सा बनाएको। म पनि अध्यक्ष थिएँ त्यही पार्टीको। म समेत अत्यधिक बहुमत स्थायी कमिटीले यो नक्सा बनाउनु पर्छ भनेपछि बाध्य भएर बनाएको हो।’
एमाले अध्यक्ष ओलीले १८ कात्तिकमा दार्चुलाको सदरमुकाम खलङ्गाबाट चुनावी सभा सुरु गर्दा राष्ट्रियतालाई प्रमुख ‘चुनावी हतियार’ बनाउने देखिएको थियो। उक्त दिन ओलीले सुदूर पश्चिम प्रदेशका तीन जिल्लामा गरेको भाषणको सार मूलतः उनी नेतृत्वको सरकारले जारी गरेको ‘चुच्चे’ नक्सालाई लिएर राष्ट्रवाद उछाल्नेमा केन्द्रित थियो। त्यसपछिका चुनावी भाषणमा ओली निरन्तर त्यसैको पक्षपोषणमा केन्द्रित भइरहेका छन्। सुदूरपश्चिम पछि गण्डकी प्रदेशमा गरेको चुनावी सभामा पनि ओलीले त्यहि कुरालाई प्राथमिकता साथ दोहोर्याएका थिए।
ओलीले चुनावी सभा सुरु गरेको दार्चुलाकै खलङ्गाबाट करिब ६५ किमी टाढा दार्चुलाकै गोकुलेश्वरमा बुधबार चुनावी सभा गर्न पुगेको सत्ता गठबन्धनका प्रमुख नेताको भाषण ओलीको चुनावी हतियारलाई खण्डन गर्न र गठबन्धनको महत्ता स्थापित गर्नमा केन्द्रित रह्यो। गठबन्धनका नेताको एकै स्वर थियो ‘चुच्चे’ नक्सा ओलीले मात्र ल्याएका हैनन्। त्यस्तै, गठबन्धनको महत्ता स्थापित गर्ने सन्दर्भमा भने गठबन्धनका नेताहरु आफूहरु संविधान बचाउन अग्रगमनतर्फको यात्रामा र ओली संविधान च्यात्तै प्रतिगमनको बाटोमा भन्ने भाष्य स्थापित गर्ने प्रयत्नमा छन्।
दार्चुला सभालाई ‘काउण्टर’ दिंदै दार्चुलाबाटै प्रधानमन्त्री तथा कांग्रेस सभापति शेरबहादुर देउवाले ‘चुच्चे’ नक्सा सबै दल भएर ल्याएकोले ओलीले मात्र ल्याएको भन्ने दावी गर्नु गलत भएको टिप्पणी गरे।
‘अहिले धेरै किसिमका अफवाह फैलाउने काम भइरहेका छन्। मैले सुनिरहेको छु ओलीजी आएर दार्चुलामा लिपुलेक फिर्ता ल्याउँछु भन्नुभएछ। उहाँले भनेर केही हुनेवाला छैन। यो कालापानी, लिपम्पियाधुरा, लिपुलेक नेपालको भूमि हो भनेर संसद्ले एकलौटी भएर, एक आवाज भएर हामी सबैले पास गरेका हौं,’ देउवाले भने,‘अरुले गरेकै थिएनन्, ओलीले मात्रै गरेको भन्ने झुटा कुरा गर्नुभएको हो। दुई तिहाई उहाँले गरेर आएको छ? दुई तिहाइले गरेको हो। त्यसमा कांग्रेस, माओवादी सबै पार्टी भएर गरेको हो। अहिले ओलीले अरुले केही गरेकै छैन, आफूले मात्रै गरेँ भनेर झुटो कुरा गर्दैछन्।’
देउवाले भारतसँग सम्वाद गरेर गुमेको भूमि फिर्ता लिनु पर्नेमा ओलीले राष्ट्रलाई अप्ठ्यारोमा पारेको आरोप लगाए। ‘भारतसँग कुरा गर्नुपर्छ। ओलीजीले बोलेर जानुभएको छ, उहाँले दार्चुलामा होइन भारतसँग कुरा गर्नुपर्थ्यो। दार्चुला आएर फिर्ता हुने छैन। सबैलाई थाहा छ लिम्पियाधुरा, लिपुलेक, कालापानी कहाँ छ भन्ने। नेपालको भूभाग हो तर नेपालसँग छैन। आज राष्ट्रलाई अप्ठ्यारो ठाउँबाट ल्याइएको छ,’ देउवाले भने।
यस्तै‚ प्रचण्डले ओलीसँग एकता गरेर नेकपा बनाउंदा आफू भम्रमा परेको दुखेसो पोख्दै ओली चरित्र, उनकै शब्दमा, पाखण्डी रहेको टिप्पणी गरे।
‘संविधान सभाको विरोध गर्ने, नेपालमा गणतन्त्र हुनै सक्दैन भनेर टिप्पणी गर्ने केपी ओलीले पनि संविधानमा हस्ताक्षर गरिसकेपछि यिनको बुद्धि फिरेको भन्ने म भ्रममा परेँ, देशमा राजनीतिक स्थिरता होला भनेर पार्टी एकताको प्रस्ताव पनि गरेँ,’ प्रचण्डले भने,‘तर एकता गरिसकेपछि थाहा भयो ओली त मौकाको ताकमा बसेका रहेछन्। जब पावर हातमा आउँछ अनि यो संविधान च्यात्ने दाउमा बसेका रहेछन्। सबै उत्पीडित, जाति, वर्ग समुदायले पाएको अधिकार खोस्ने उद्देश्यले उनी बसेको थाहा भयो। उनले पाखण्डी चरित्र देखाएका रहेछन्।’
गठबन्धनको आवश्यकता र औचित्यबारे चर्चा गर्दै प्रचण्डले ओलीले संविधान च्यात्न लागेको आरोप लगाए।
‘ठूलो संघर्षबाट प्राप्त नेपाली जनताको अधिकारको संरक्षण, संविधानको रक्षा, संघीयता, लोकतन्त्र र नेपाली जनताको पक्षमा हाम्रो गठबन्धन बनेको छ,’ प्रचण्डले ओलीलाई र एमालेलाई लक्षित गर्दै भने, ‘जो हिजोका दिनदेखि नै संघर्षबाट प्राप्त उपलब्धिहरुको विरोधी थियो। अहिले पनि निकै ठूलो संघर्ष, त्याग र बलिदानबाट प्राप्त उपलब्धिहरुलाई उल्टाउन चाहन्छ, संविधानलाई च्यात्न चाहने, मुलुकमा राजतन्त्र फर्काउन चाहनेहरुको पनि गठबन्धन बनेको छ। त्यसको नेतृत्व केपी ओलीले गरेका छन्।’
यता प्रधानमन्त्री देउवाले वर्तमान गठबन्धनको आवश्यकता रहेको भन्दै यो बर्षैँसम्म जाने बताए।
‘लामो लडाइँपछि लोकतान्त्रिक व्यवस्था हामीले ल्याएका छौं। यसलाई बचाएर देशको विकास गर्नुछ। देशलाई समृद्ध, सम्पन्न बनाउनु छ। त्यसैले आज यो महत्वपूर्ण जिम्मेवारी गठबन्धनको काँधमा आएको छ। हामीमा पूर्ण एकता छ। कुनै शंका नगरे हुन्छ। यो गठबन्धन वर्षौंसम्म चल्नेछ। नेपालको अहिलेको आवश्यकता हो। राष्ट्रिय आवश्यकता हो,’ देउवाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1710220882.jpg)
-1751793737.png)
-1749826086.png)
