क्रिकेटमा स्पट फिक्सिङ : क्यानका अध्यक्ष चन्दसँग सीआईबीले गर्‍यो सोधपुछ

क्रिकेट

नारायण अधिकारी बिहीबार, पुस २१, २०७९ १४:३२

काठमाडौं– नेपाल टी–२० लिग क्रिकेट प्रतियोगितामा फिक्सिङ र बेटिङ प्रकरणमा प्रहरीको केन्द्रीय अनुसन्धान ब्यूरो (सीआईबी)ले नेपाल क्रिकेट संघ (क्यान)का अध्यक्ष चतुरबहादुर चन्दसँग सोधपुछ गरेको छ।

सीआईबीले बुधबार दिउँसो चन्दलाई सीआईबीमा बोलाएर सोधपुछ गरेको हो। सीआईबी स्रोतका अनुसार चन्दसँगै पूर्वकप्तान तथा म्यानेजर विनोद दास पनि सीआईबीमा पुगेका थिए। उनीहरुलाई फिक्सिङ र बेटिङका बारेमा मिडियाका घटना विवरणहरुका बारेमा सोधपुछ गरिएको थियो।

आयोजक कम्पनी सेभेन थ्री स्पोर्ट्स, त्यसका प्रायोजकहरु बेटिङ र फिक्सिङ हुने सम्भावनाहरुलगायतका बारेमा सोधपुछ गरिएको सीआईबी स्रोतले नेपाल लाइभलाई जानकारी दियो।

‘हामीले घटनाका बारेमा आवश्यक सोधपुछ गरेका छौं’, सीआईबीका एक अधिकारीले भने, ‘उहाँहरुले अनुसन्धनमा सहयोग गर्ने प्रतिबद्धता जनाएर जानुभएको छ।’

बेटिङ खेलाउनेहरु र फिक्सरहरुको सम्बन्ध छ–छैन भन्ने पाटोबाट प्रहरीले अनुसन्धन अघि बढाइरहेको छ।

अनुसन्धान गरिरहेको सीआईबी स्रोतले एक पूर्वराष्ट्रिय खेलाडी समेत अनुसन्धानको राडरमा रहेको जनाएको छ। मुख्यगरी विदेशी खेलाडीहरुलाई प्रयोग गरेर स्पट फिक्सिङ (बल टु बल) गरिएको हुनसक्ने प्रहरीको आशंका छ।

चन्द नेतृत्वले नै २०७७ मंसिरमा लिगको सम्पूर्ण जिम्मा भारतीय कम्पनी सेभेन थ्री स्पोर्ट्सलाई दिएको थियो। भारतमा बेटिङ समेत गराउने गरेको भनेर बदनाम भएको कम्पनीबाट सुरुमा १० वर्षका लागि क्यानले लिग सञ्चालनको जिम्मा दिएको थियो। उक्त अवधिमा क्यानले ४२ करोड रुपैयाँ पाउने सम्झौता भएको थियो।

विवाद भएपछि त्यसलाई छोट्याएर ८ वर्षमा झार्दै ३३ करोड रुपैयाँ पाउने सर्तमा क्यानले सेभेन थ्री स्पोर्ट्सलाई जिम्मा दिएको थियो। यो कम्पनीलाई नेपाल टी–२० लिगको सम्पूर्ण व्यवस्थापन गर्ने, खेलाडी अनुबन्धन, टेलिभिजन प्रसारण, प्रायोजकसम्म सबैको जिम्मा दिइएको थियो।

ग्लोबल टेन्डर नै नगरी सार्वजनिक खरिद नियमावली छलेर क्यानले सुटुक्क ८ वर्षसम्म प्रतियोगिता सञ्चालनको सबै जिम्मा सेभेन थ्री स्पोर्ट्सलाई सुम्पिएपछि उक्त विवाद त्यतिबेलै संसद्‌देखि सर्वोच्च अदालतसम्म पुगेको थियो।

लिगमा विवादमा परेसँगै यसका निर्देशक जटिन अहलुवालिया फरार भइसकेका छन्। सुरक्षा कारण देखाउँदै उनी भारत पुगेका हुन्।

क्यानलाई समेत जानकारी नै नदिइ उनी भारत पुगेका हुन्। फिक्सिङको आरोपमा अनुसन्धान सुरु भएलगत्तै फरार हुनुले घटनालाई थप रहस्यमय बनाएको छ।

कम्पनीका प्रमुखले नै नेपाल छाडेपछि प्रतियोगिता थप अन्योल बनेको छ भने खेलाडीले पाउने पारिश्रमिक समेत के हुने भन्ने अनिश्चित भएको छ।

यता क्यानले भने प्रतियोगिता जारी रहने र खेलाडीले पनि पारिश्रमीक पाउने बताएको छ।

कम्पनीका प्रमुख नै फरार भएपछि अब सम्झौता रद्द गरिने क्यानले जनाएको छ। त्यसका लागि प्रक्रिया समेत अघि बढाइएको क्यानको दाबी छ। सेभेन थ्री स्पोर्ट्सलाई सेटिङमा नै लिग आयोजना गर्ने जिम्मा दिइएको भन्दै आमिर अख्तरले सर्वोच्चमा मुद्दा समेत हालेका थिए। उक्त मुद्दा अहिलेसम्म विचाराधीन अवस्थामै छ। सेभेन थ्री स्पोर्ट्सले भने मुद्दाको टुंगो नलागी रकम नदिने बताएको थियो।

एक जना पक्राउ
अनुसन्धान गरिहरेको टोलीले बेटिङ खेलाएको आरोपमा त्रिवि क्रिकेट मैदानबाट बुधबार एक जनालाई पक्राउ गरेको छ। भारत घर भइ काठमाडौंको गौशाला बस्दै आएका ३६ वर्षीय प्रतीक कुमार पक्राउ परेका छन्।

उनले बुधबार भएको फार वेस्ट युनाइटेड र विराटनगर सुपर किङ्सबीचको खेलमा बेटिङ गरेको पाइएको प्रहरी स्रोतले जनाएको छ।

सम्बन्धित समाचार :
क्रिकेटमा स्पट फिक्सिङ: भारतमा रहेका पूर्वराष्ट्रिय खेलाडीसम्म देखियो ‘नेक्सस’
नेपाल टी–२० लिगमा फिक्सिङ र बेटिङको आशंका, अनुसन्धान गर्दै सीआईबी