काठमाडौं– बुधबार तीन मन्त्री नियुक्त भएसँगै वर्तमान मन्त्रिपरिषद्मा कांग्रेसको कोटा पूरा भएको छ। गत पुष १० गते प्रधानमन्त्री बनेयता पुष्पकमल दाहाल प्रचण्डले बुधबार नवौं पटक मन्त्रिपरिषद् विस्तार गरेका हुन्। यद्यपि, मन्त्रिपरिषद् अझै पूर्ण भने भइसकेको छैन।
यता नेपाली कांग्रेसबाट सरकारमा आठ जना विभागीय मन्त्री नियुक्त भइसकेका छन्। यसअघि चैत्र १७ गते भएको मन्त्रिपरिषद् विस्तारमा कांग्रेसले पार्टीको आन्तरिक विवाद देखाउँदै भागमा परेका सबै मन्त्री पठाएको थिएन्। त्यसबेला पाएका आठमध्ये संस्थापन र संस्थापन इतर डा शेखर कोइराला र महामन्त्री गगन थापाबीच मन्त्री कसरी बाँडफाँट गर्ने भन्ने कुरामा सहमति हुन सकेको थिएन।
पार्टीको भागमा परेका आठ मन्त्रालयमध्ये ६ वटामा आफ्नो पक्षबाट र दुई जना मात्रै शेखर–गगन पक्षबाट सहभागी गराउने सभापति देउवाले तयारी गरे। तर यसमा शेखर–गगन पक्षले त्यस प्रस्तावलाई अस्वीकार गर्दै तीन मन्त्रालय आफूहरुलाई अनिवार्य चाहिने अडान राखे। महामन्त्रीद्वय गगन थापा र विश्वप्रकाश शर्माले युवा पुस्ताबाट प्रदीप पौडेललाई मन्त्री बनाउन सभापति देउवामाथि दबाब सिर्जना गरिरहे।
पौडेलका लागि सभापति देउवासँग महामन्त्रीद्वयले पटक–पटक छलफल गरे पनि देउवाले त्यसलाई बेवास्ता गरिरहे। केही महिनाअघि भएको कांग्रेस संसदीय दलको निर्वाचनमा आफूलाई नसघाएकाले देउवा पौडेललाई मन्त्री बनाउन तयार थिएनन्।
उक्त निर्वाचनमा काठमाडौं–५ बाट प्रतिनिधि सभामा निर्वाचित पौडेल संसदीय दलको नेताका लागि महामन्त्री गगन थापाको समर्थक बसेका थिए। पौडेल मात्र होइन संसदीय दलको निर्वाचनमा अर्का महामन्त्री शर्मा पनि समर्थक थिए। त्यही कारण पौडेलप्रति आक्रोशित देउवाले महामन्त्रीद्वयले जति जोडबल गरे पनि मन्त्री बनाउन तयार भएनन्। जसमा अन्तत: देउवा सफल पनि भए।
महामन्त्रीद्वयको दबाबलाई काउन्टर दिन देउवाले उक्त समूहका नेता शेखर कोइरालालाई नै समाते। कोइरालालाई पनि महामन्त्री थापाले संसदीय दलको निर्वाचनमा उछिनेको कुराको बदला लिने संयोग मन्त्री छान्ने प्रकरणमा देउवाको धापले जुटेको कांग्रेस नेताहरुबीचमा चर्चा चलिरहेको छ।
त्यही कारण हुन सक्छ इतर समूहको बैठकमा आफ्नो समूहबाट तीनजना मन्त्री बनाउने महामन्त्रीको प्रस्तावमा अडिग देखिएका कोइराला देउवाको प्रस्तावमा भने राजी भइहाले। इतरपक्षले मन्त्रिपरिषद् विस्तारमा मन्त्रीको संख्यासँगै एउटा महत्त्वपूर्ण मन्त्रालयको पनि दाबी पनि गरेको थियो। तर देउवा त्यसलाई क्रस गर्दै अघि बढे।
यसका साथै इतरपक्षबाट उपसभापति धनराज गुरुङसहित सहमहामन्त्रीबाट एकजना मन्त्री बनाउने र एकमा महामन्त्रीद्वयले प्रदीप पौडेललाई पठाउने जोडबल गरिरहेका थिए। तर बुधबार नियुक्त भएका तीन मन्त्रीमा उपसभापति धनराज गुरुङ, मोहनबहादुर बस्नेत र डिगबहादुर लिम्बूमध्ये स्वास्थ्यमन्त्रीको जिम्मेवारी पाएका बस्नेत सभापति देउवा पक्षका हुन्। कानुनमन्त्रीको जिम्मा पाएका उपसभापति गुरुङ र युवा तथा खेलकुद मन्त्रीको जिम्मा पाएका लिम्बू शेखर–गगन पक्षका हुन्।
युवा तथा खेलकुद मन्त्री बनेका लिम्बू नेता शेखर कोइरालाका अन्त्यन्तै निकट मानिन्छन्। लिम्बू मोरङ कांग्रेसका दुई पटक जिल्ला सभापति भएका नेता हुन्। इतर पक्षमा मुख्यगरी महामन्त्री थापा लिम्बूको ठाउँमा पनि सहमहामन्त्री बद्री पाण्डे र जीवन परियारमध्ये एक जनालाई मन्त्री बनाउनुपर्ने जोड दिँदै आएका थिए। तर त्यहाँ पनि नेता कोइरालाले महामन्त्री गगन थापालाई क्रस गर्दै लिम्बूलाई मन्त्रिपरिषद्मा पठाए।
मंगलबार दिउँसो सभापति देउवाले कोइरालासँग छलफल गरेका थिए। मंगलबार साँझ नै कोइराला उपचारका लागि सिंगापुर लागे। तीन जनाको अडान राख्दै आएको इतरपक्षबाट दुई जना मात्र सहभागी हुनमा कोइराला सहमत हुनुलाई लिएर कांग्रेस नेताहरुबीच कोइरालाले महामन्त्रीद्वयलाई काउन्टर दिएको चर्चा चलिरहेको छ।
गत सोमबारदेखि नै देउवाले पार्टीका उपसभापतिद्वय पूर्णबहादुर खड्का, धनराज गुरुङ र महामन्त्रीद्वय गगन थापा र विश्वप्रकाश शर्मासँग पार्टीको आन्तरिक विषयबाट लगातार अनौपचारिक छलफल गरिरहेका छन्। बिहीबार पनि छलफल भएको छ। विहीबारको छलफलमा उपसभापतिद्वयका साथै महामन्त्रीद्वय थापा र शर्मा तथा सहमहामन्त्रीहरु उपस्थित थिए।
सहमहामन्त्री जीवन परियारले बिहीबार देउवा निवासमा भएको पदाधिकारीको छलफलमा पार्टीले पठाएका मन्त्रीबारे कुराकानी भएइको बताए। ‘समावेशीता र युवा पुस्ताको तर्फबाट अझ राम्रो मान्छे सरकारमा पठाउन सक्थ्यौं’, उनले भने, ‘सभापतिजीले पाँच वर्षको वर्तमान कार्यकालमा अर्कोपटक मौका आए नयाँ पुस्तालाई अवसर दिने भन्दै सबैलाई एकैपटक समेट्न नसकिने स्वीकार गर्नुभयो।’ परियारले पार्टीहरुमा जहिल्यै पनि मन्त्री बन्नेहरुको सूची लामो हुने भन्दै यसमा देखिएको असन्तुष्टिलाई आफूहरुले समान्य रुपमा लिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751859077.png)
-1751793737.png)
-1749826086.png)
