गणतन्त्र मूल समारोहमा सुदूरपश्चिम प्रदेश भौतिक पूर्वाधार विकासमन्त्री प्रकाशबहादुर देउवा
धनगढी- सुदूरपश्चिम प्रदेश गणतन्त्र मुल समारोह समितिको अध्यक्ष हुन्छन् मुख्यमन्त्री। सोमबार १६ औं गणतन्त्र दिवसको अवसरमा मूल समारोह समितिले आयोजना गरेको कार्यक्रममा स्वयं मुख्यमन्त्री कमलबहादुर शाह सहभागी भएनन्।
उनकै अध्यक्षतामा रहेको समितिको बैठकले उनको अध्यक्षतामा विशेष समारोह आयोजना गर्ने निर्णय गरेको थियो। तर, आइतबार नेपाली कांग्रेस डोटीको जिल्ला समारोहलाई समुद्घाटन गर्न डोटी पुगेका मुख्यमन्त्री शाह प्रदेश भ्रमणमै व्यस्त छन्। कार्यक्रममा उपस्थीत हुन्छ भनी नाम टिपाएका मुख्यमन्त्री भने कार्यक्रममा सहभागी नहुने भएपछि मात्रै नाम हटाईएको थियो।
धनगढी ट्राफिक चौराहदेखि आन्तरिक मामिला तथा कानुन मन्त्रालयको प्राङ्गणसम्म प्रभातफेरी कार्यक्रम आयोजना गरिएको थियो। प्रभातफेरीमा प्रदेश सरकारका मन्त्री, सभामुख, उपसभामुख, विषयगत समितिका सभापति, प्रदेश सभा सदस्य, प्रमुख सचिव, मन्त्रालयका सचिव, धनगढी उपमहानगरपालिकाका नगर प्रमुख, निजामति कर्मचारी, सुरक्षा निकायका प्रमुख, संघ–संस्थाका प्रतिनिधि, सञ्चारकर्मी, विद्यार्थी लगायतको सहभागिता रहेको थियो। बाजागाजासहित चौराहबाट सुरु भएको प्रभातफेरी कानुन मन्त्रालयको प्राङ्गणमा विशेष समारोह आयोजना गरिएको थियो।
विगतमा धनगढी उपमहानगरपालिकाको सहकार्य र आन्तरिक मामिला तथा कानुन मन्त्रालयको सहयोगमा मूल समारोह समितिले दिवस मनाउँदै आएको थियो।
प्रभातफेरीमा देखिएका नेकपा माओवादी केन्द्रका केही प्रदेश सभा सदस्यले विशेष समारोह वहिष्कार गरे।
विशेष समारोहको अध्यक्षता मुख्यमन्त्री शाहले गर्नुपर्नेमा अनुपस्थित भएपछि भौतिक पूर्वाधार मन्त्री प्रकाशबहादुर देउवाले गरे। प्रदेश प्रमुख देवराज जोशीको प्रमुख आतिथ्यमा भएको कार्यक्रमको स्वागत आन्तरिक मामिला तथा कानुन मन्त्री पृथ्वीबहादुर सिंहले गरे।
सञ्चालकले अतिथिहरुको आसन ग्रहण गराउने क्रममा मर्यादाक्रम विगारेपछि नेकपा माओवादीका दुई जना प्रदेश सभा सदस्यले विशेष समारोह वहिष्कार गरेका थिए। प्रदेश सभा सदस्य अक्कल बहादुर रावल र मान बहादुर धामीले आफुहरुले कार्यक्रममा बस्न उचित नभएको भन्दै कार्यक्रमबाट बाहिरिएका थिए।
प्रदेश सभा सदस्य रावलले भने –‘जिम्मेवार मन्त्रालयको प्रांगणमा कार्यक्रम हुँदै छ। जिम्मेवार हुनु पर्ने हो तर, गैर–जिम्मेवार भएको भन्दै आफू कार्यक्रमबाट बाहिरीएको हुँ।’ उनले जिम्मेवार मन्त्रालयले नै मर्यादाक्रम मिचेर कार्यक्रम गरेको आरोप लगाए।
मन्त्रालयका कर्मचारीहरुलाई पहिले आसन ग्रहण गराउने त्यपछि माननियको आसन ग्रहण गर्ने नियम नरहेको उनको भनाई छ ।
'ऐतिहासिक दिनमा पनि हाम्रा मुख्यमन्त्री ज्यूको उपस्थीती नहुन भनेको कति गैर जिम्मेवार छन् भन्ने देखाएको प्रदेश सभा सदस्य मान बहादुर धामीले बताए। अहिलेको सरकार पुरानै शैलीमा चल्दै आएको उनले दाबी गरे। ‘प्रदेशमा यति ठुलो कार्यक्रम भइरहदा मुख्यमन्त्री सानो तिनो कार्यक्रमको उद्घाटन गर्दै बस्नु भएको छ। यस्तो नि हुन्छ’ उनले प्रश्न गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
