काठमाडौं– गैरआवासीय नेपाली संघको १०औं केन्द्रीय महाधिवेशनबाट दुई फ्याक रहेको प्रवासी नेपालहरुको संगठनको एकता हुने भएको छ। जसका लागि १२ अगष्टमा दुवै पक्षहरुको एकताको साधारण सभा हुन लागेको छ।
कसरी फुट्न पुगेको थियो?
यसलाई बुझ्न २०७८ को चैतमा पुग्नुपर्छ। विवादको कारण दशौं महाधिवेशन हुन सकेको थिएन। त्यो बीचमा उक्त संगठन भित्र स्पष्ट २ कित्ता थियो। र विवादको कारण थियो, प्रतिनिधि छनोट। र त्यसको केन्द्रमा थिए संरक्षकसमेत रहेका एनआरएनएका पूर्व अध्यक्ष शेष घले र एनआरएनएका तत्कालीन अध्यक्ष कुमार पन्त।
२०७८ को चैत ११ र १२ गते पन्त समूहले १०औं महाधिवेशन गराएर ३ जना अध्यक्ष चयन गर्यो। सो गुटभित्रको विवाद मिलाउन विधान सोझ्याएर अर्को महाधिवेशनसम्मका लागि रोटेसनमा अध्यक्षता गर्ने भन्दै कुल आचार्य, बद्री केसी र रविना थापालाई अध्यक्ष बनायो।
पन्त समूह भन्दा एक कदम अघि बढेर घले समूहले सोहि महिनाको ९ गते समानान्तर दशौं महाधिवशेन गरेर विनोद कुँवरलाई अध्यक्ष बनायो। पन्त समूहको उद्घाटन तत्कालीन प्रधानमन्त्री शेरबहादुर देउवा र तत्कालीन राष्ट्रपति विद्यादेवी भण्डारी पुगेर गरेका थिए। यता घले समूहको उद्घाटनमा भने तत्कालीन अर्थमन्त्री जनार्दन शर्मा पुगेका थिए।
यो समूहको वैधानिकताको मुद्दा पाटन उच्च अदालतमा अद्यापि विचाराधीन रहेको छ।
कसरी मिल्ने ठाउँमा पुगे?
वैधानिकताको विषयले आकार नलिकन दुई समूहमा विभाजित एनआरएनहरु मिल्ने स्थितिमा पुगेका छन्। यसका लागि प्रधानमन्त्री पुष्पकमल दाहाल प्रचण्डले मध्यस्थता गरेका छन्।
दुवैतर्फको समितिको तर्फबाट गठित वार्ता समितिको प्रयास पश्चात् १८ जुन २०२३ मा प्रधानमन्त्रीको उपस्थितिमा सहमति पत्रमा हस्ताक्षर गरिएको थियो।
दुवै पक्ष अब एकताको ११ औँ महाधिवेशन गर्ने तयारीमा छन्। पन्त पक्षका एक अध्यक्ष कुल आचार्यले प्रधानमन्त्रीको मध्यस्थतामा प्रवासी नेपालीहरु एक ठाउँमा आउन सहमत भएको बताउँछन्। प्रक्रियागत रुपमा चरणबद्ध ढङ्गले एकता प्रक्रिया अघि बढ्ने आचार्यको दाबी छ।
‘हाम्रै पहलमा वार्ता कमिटी बनाएर प्रधानमन्त्रीको मध्यस्थतामा एउटा सहमति भएको छ। अब १२ अगष्टमा एकताको साधरण सभा हुन्छ। चरणबद्धरुपमा एक हुँदै जाने भन्ने हामीबीच सहमति भएको छ,’ आचार्यले नेपाल लाइभसँग कुरा गर्दै भने।
उक्त सहमतिपछि दुवै पक्षका महासचिवहरुले विज्ञप्ति निकालेर एकताको महाधिवेशन गर्न मातहतका इकाइहरुलाई निर्देशन दिएका छन्। र हुन लागेको राष्ट्रिय परिषद्को बैठकको तयारी गर्न आग्रह समेत गरेका छन्।
संस्थापन पक्षका महासचिव गौरिराज जोशी र डा केशव पौडेलले एक विज्ञप्ति प्रकाशित गरी एकताको सन्देश प्रवाह हुने किसिमले अधिवेशन गर्न निर्देशन दिएका छन्।
‘दुई पक्षबीच गरिएका सहमतिलाई अक्षरश: कार्यान्वयन गर्दै एकताको ११ औं केन्द्रीय महाधिवेशन तथा विश्वभर रहेका सम्पूर्ण राष्ट्रिय समन्वय परिषद्मा एकताको महाधिवेशन सम्पन्न गर्नु हामी सबैको दायित्व हो। तसर्थ संघको राष्ट्रिय समन्वय परिषद्लाई आवश्यक समन्वय, सहकार्य र एकता कायम गर्दै राष्ट्रिय महाधिवेशन सम्पन्न गर्न अनुरोध साथ निर्देशन गरिन्छ,’ विज्ञप्तिमा उल्लेख छ।
सो विज्ञप्तिमा ‘एनआरएनएको गौरवपूर्ण इतिहासलाई कायम गर्ने किसिमले’ संगठनको एकताको सन्देश प्रवाह गर्न आग्रह गरिएको छ। ‘गैरआवासीय नेपालीको एकता, आपसी सद्भाव, भ्रातृत्व कायम गर्दै संघको २०औं वर्षको स्वर्णिम इतिहासलाई स्मरण गर्दै आगामी दिनहरुमा संघलाई अझ उचाईमा पुर्याउन थप एकता र सहमतिसहित सबै राष्ट्रिय समन्वय परिषदमा एकताको सन्देश प्रवाह गर्नुहुन सबैलाई हार्दिक अनुरोध गर्दछौं,’ जोशी र पौडेलद्वारा हस्ताक्षरित विज्ञप्तिमा उल्लेख छ।
यस्तै, कुँवर समूहकी महासचिव जानकी गुरुङ्गले पनि शुक्रबार एक विज्ञप्ति जारी गरेकी छन्। विज्ञप्तिमा २०२३ को अगष्ट १२ मा एकताको विशेष साधारण सभा गर्न लागिएको भन्दै मातहतका परिषद्हरुलाई सूचित गरेकी छन्।
‘संघमा भएको विभाजनलाई अन्त गरी एकताको महाधिवेशनतर्फ उन्मुख भएको वर्तमान अवस्थामा सामूहिक बैठक बसी दुवैपक्षको विधानलाई छलफल गर्न र सहमतिका बुँदाहरूलाई अनुमोदन गरी असहमत भएका बुँदाहरूलाई छलफल गरी अभिलेखिकरण गर्न १२ अगष्टमा विशेष साधारण सभा गरीने पनि जानकारी गराउन चाहन्छु,’ विज्ञप्तिमा उल्लेख छ।
दुई पक्षबीच गरिएका सहमतिलाई अक्षरश: कार्यान्वयन गर्दै एकताको ११ औं केन्द्रीय महाधिवेशन तथा विश्वभर रहेका सम्पूर्ण राष्ट्रिय समन्वय परिषदहरुमा एकताको महाधिवेशन सम्पन्न गर्ने गुरुङले जारी गरेको विज्ञप्तिमा उल्लेख छ।
यसका लागि गैरआवासीय नेपाली संघ राष्ट्रिय समन्वय परिषद्मा सदस्यता वितरण प्रक्रिया समाप्त भएका मुलुकहरुको हकमा समानान्तर रूपमा गठन भएका समितिहरुले वितरण गरेको सदस्यतालाई आपसी समझदारीमा क्षेत्रिय संयोजक, सहसंयोजक, र दुबै पक्षका एनसिसिका कार्यसमिति बसि आपसी सहकार्य गरी समायोजन गर्न र सदस्यता वितरण प्रक्रिया समाप्त नभएका देशहरुमा पनि वितरण समिति, निर्वाचन समिति, महाधिवेशन अनुगमन समिति लगायतका विभिन्न समितिहरुमा बराबरी प्रतिनिधित्व गराउदै सदस्यता वितरण एवम महाधिवेशन आयोजना गर्न दुइ पक्ष सहमत भएका छन्।
विज्ञप्तिले द्विविधा
केन्द्रीय नेतृत्वबीच एकताको महाधिवेशन गर्ने सहमति भए पनि मातहतका इकाइमा भने द्विविधा कायमै रहेको पाइएको छ। एनआरएनए युकेमा दुवै पक्षले जुलाईमै छुट्टा–छुट्टै महाधिवेशनको तयारी गरिरहेका छन्। स्पष्ट दुई समूह रहेको युकेमा केन्द्रमा गरिएको सहमतिको कुनै असर देखिएको छैन।
यता, अध्यक्ष आचार्य भने अब कुनै द्विविधामा नरही एकताका गतिविधि अगाडि बढाइने बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751886908.jpg)
-1751885868.jpg)
-1751793737.png)
-1749826086.png)
