कारागारबाट मुक्त भएलगत्तै पक्राउ परेका युनुसमाथि अनुसन्धान गर्न ५ दिन म्याद थप

सुरक्षा/अपराध

नेपाल लाइभ आइतबार, जेठ ११, २०८२ १४:४०

काठमाडौं–नक्कली भारतीय रकमको कारोबारसम्बन्धी मुद्दामा कैद सजाय भुक्तान गरी नख्खु कारागारबाट मुक्त भएलगत्तै पक्राउ परेका युनुस अन्सारीलाई सम्पत्ति शुद्धीकरणको कसुरमा पाँच दिनको म्याद थप भएको छ।

नक्कली भारतीय मुद्राको कारोबारमा उनको संलग्नतासँगै स्रोत नखुलेका करोडौं रकमको कारोबार देखिएका कारण नेपाल राष्ट्र बैंकको वित्तीय अनुसन्धान इकाइले प्रहरीलाई पत्राचार गरेको थियो।

प्रहरीको केन्द्रीय अनुसन्धान व्युरोअन्तर्गतको आर्थिक अपराध अनुसन्धान महाशाखाका प्रमुख एसएसपी होविन्द्र बोगटीका अनुसार राष्ट्र बैंकले केही महिना पहिल्यै पत्राचार गरेको हो, तर, अनुसन्धान गरिनुपर्ने व्यक्ति कारागारमा कैद भएको अवस्थामा यथेष्ट अनुसन्धान हुन नसकेको उनले बताए।

‘स्रोत नखुल्ने रकमको कारोबारमा उनको संलग्नता देखिएको छ’, बोगटीले भने, ‘अनुसन्धानबाट खुलेका विषयमा उनको बयान र थप प्रमाणसहित हामी मुद्दाको म्यादभित्रै अदालत पेश गर्ने छौं।’

नक्कली भारतीय नोटको कारोबारको मुद्दामा दोषी ठहर भई नख्खु कारागार चलान भएका उनी शनिबार साँझ मुक्त भएका थिए। लगत्तै उनलाई सीआईबीको टोलीले पक्राउ गरेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

अनेरास्ववियुमा ३२ वर्षे उमेर हद लगाउने एमालेको निर्णय

१५ औं राष्ट्रपति रनिङ सिल्ड जेठ अन्तिममा

युवा संघकाे अध्यक्षका लागि क्षितिज थेबेद्बारा मनोनयन दर्ता