सांसद बन्न तीव्र आकांक्षी वामदेवको उधारो सहमति

राजनीति

वीरेन्द्र ओली शनिबार, वैशाख २०, २०७७ २२:३०

काठमाडौं- नेकपा सचिवालय बैठकले उपाध्यक्ष वामदेव गौतमलाई उपयुक्त समयमा प्रतिनिधिसभा सदस्यको उम्मेदवार बनाउने निर्णय गरेको छ। तर कहिले र कुन ठाउँबाट निर्वाचित गराएर उनलाई सांसद बनाउने भन्ने चाहिँ यकिन छैन।

प्रधानमन्त्री केपी ओलीसँग गौतमले शनिबार दिउँसो उधारोमा सहमति गरेका थिए। त्यसैमा सचिवालयले लाहाछाप लगाइदिएको हो। गएको निर्वाचनमा बर्दियाबाट पराजित गौतम पटक-पटक संसद् प्रवेशको प्रयासमा छन्। तर उनी सफल हुने सकिरहेका छैनन्।

प्रतिनिधिसभाको सदस्य हुने चाहना पूरा नहुँदा उनले राष्ट्रियसभामा जाने चाहना पनि देखाए। सचिवालयले उनको चाहनालाई स्वीकार गर्‍यो तर प्रधानमन्त्री केपी शर्मा ओली विपक्षमा देखिए।

शनिबारको सचिवालय बैठकसँगै वामदेव राष्ट्रियसभामा राष्ट्रपतिले मनोनित गर्ने कोटाबाट प्रतिनिधिसभातिर धकेलिएका छन्। गौतमलाई प्रतिनिधिसभामा उपयुक्त समयमा प्रवेश गराउन पहल गर्ने निर्णय सचिवालय कमिटीले गरेपनि उनकी कहिले प्रतिनिधिसभा सदस्य बन्नेछन् भन्ने अनिश्चित छ। गौतमले संसद प्रवेश गर्न मरिहत्ते गरेकाले एकपछि अर्को गर्दै बदनाम भएका छन्। यसले गर्दा यदि गौतम निर्वाचनमा प्रतिस्पर्धा गरेपनि चुनाव जित्न महाभारत हुने देखिन्छ।

यसअघि बुधबार बसेको सचिवालय बैठकमा प्रधानमन्त्री केपी ओलीले संविधान संशोधन गरेरै भएपनि राष्ट्रियसभामा बामदेवलाई ल्याएर प्रधानमन्त्री बनाउने प्रस्ताव गरेका थिए। लगत्तै गौतम फुरुंग हुँदै राष्ट्रियसभा प्रवेशका सम्बन्धमा कानुन व्यवसायीसँग छलफल गरेका थिए उनले। तर शनिबारको सचिवालय बैठकपछि माहोल परिवर्तन भएको छ।

बैठकपछि पत्रकारसँग कुरा गर्दै प्रवक्ता नारायणकाजी श्रेष्ठले गौतमलाई उपयूक्त समय हेरेर प्रतिनिधिसभा पठाउने निर्णय भएको सार्वजनिक गरे। गौतम उपयूक्त समयमा प्रतिनिधिसभा जाने विषयमा सहमति गरेर फर्किए। कुनै सांसदलाई फिर्ता बोलाउने हो वा कुनै स्थान रिक्त भएमा वामदेवलाई उम्मेदवार बनाएर प्रतिनिधिसभा भित्र्याउने भन्ने खुलेको छैन। कुनै उम्मेदवारलाई राजीनामा गराएर गौतमलाई प्रतिनिधिसभा ल्याउने तयारी गरिएको धेरैको बुझाइ छ। गौतम सहजै 'कन्भिन्स' हुने भएकाले प्रधानमन्त्री ओलीको आश्वासनमा सहमत भएका छन्।

वामदेवलाई संसद् छिर्न एकपछि अर्को अवरोध
गत प्रतिनिधिसभा निर्वाचनमा बर्दिया क्षेत्र नम्बर १ बाट कांग्रेस नेता सञ्जय गौतमसँग ७ सय ७५ मतले पराजित भएपछि गौतम चिन्तित भएका थिए। तत्कालिन माओवादी अध्यक्ष प्रचण्डलाई फोन गरेर आफूलाई आफ्नै पार्टीका अध्यक्ष केपी ओलीद्धारा हराएको संगिन आरोप लगाए गौतमले। तर गौतमको निर्वाचन क्षेत्रमा भने अवस्था फरक थियो। दोस्रो संविधानसभा निर्वाचनमा बर्दिया र प्यूठान दुवै ठाउँबाट निर्वाचित भएपछि उनी बर्दिया छोडेको भन्दै मतदाता रुष्ट थिए। बर्दिया घर भन्ने गरेपनि आफ्नो निर्वाचन क्षेत्रमा विकास निर्माणजस्ता कार्यमा खास्सै मतलब नगरेको, भावी प्रधानमन्त्री मै हुँ भन्दै अर्को चुनावमा छोरा हरिष आउने अभिव्यक्ति दिएपछि बर्दियाका स्थानीय नेताहरू चिढिएपछि निर्वाचनमा हराएका थिए। जसका कारण वाम गठबन्धनका सबैजसो शीर्ष नेता चुनाव जित्दासमेत वामदेव पराजित भए।

निर्वाचन हारेको ६ महिनासम्म गौतम चुपचाप थिए। अध्यक्ष प्रचण्डले राष्ट्रियसभा वा अन्य कुनै विकल्पबाट भएपनि गौतम संसदमा आउनुपर्छ भन्दा उनी प्रत्यक्ष निर्वाचनबाटै आउने अडान लिइरहे। लामो समय चुपचाप लागेका गौतम साउन पहिलो साता २०७५ मा डोल्पाका सांसद धनबहादुर बुढालाई राजीनामा गराएर निर्वाचन लड्ने विषय बाहिरियो। बुढालाई राजीनामा गराएर २ वर्षपछि राष्ट्रियसभामा मनोनित गराएर मन्त्री बनाउने आस्वासन दिएर फकाएका थिए।

मन्त्री हुने पक्कापक्की जस्तै भएपछि बुढाले सांसद पदबाट राजीनामा दिन सहमत भएका थिए। डोल्पाकै मतदाताले राजधानीमा पत्रकार सम्मेलन नै गरी गौतम निर्वाचन लड्न आए हराउने चेतावनी दिएपछि रोकिए गौतम। डोल्पा जाने बाटो बन्द भएपछि उनकै जोडबलमा पछि बुढा पर्यटन राज्यमन्त्री हुन सफल भएका थिए। डोल्पाबाट निर्वाचन लड्ने वातावरण नभएपछि बाँकेका नन्दलाल रोका, दैलेखका रवीन्द्रराज शर्मा, प्यूठानकी दुर्गा पौडेल, रुकुम पूर्वबाट कमला रोक्का र नवलपरासी पश्चिमबाट तिलक महतलाई राजीनामा गराएर निर्वाचन लड्ने प्रयास गरिरहे।

उनको सांसद् बन्ने चाहना रोकिने कुरा थिएन। काठमाडौं क्षेत्र नम्बर ७ का सांसद रामवीर मानन्धरले गौतम र अध्यक्ष प्रचण्डकै जोडबलमा प्रधानमन्त्री केपी ओलीसमेतलाई राजीनामासमेत बुझाए। उता नेकपा संसदीय दलका नेतासमेत रहेका प्रधानमन्त्री ओलीले राजीनामा स्वीकृत गरेनन् भने मानन्धरको निर्वाचन क्षेत्रका मतदाताले चर्को विरोध गरेपछि गौतम ब्याक भए।

१५ फागुन ०७५ मा ताप्लेजुङ हेलिकोप्टर दुर्घटनामा पर्यटनमन्त्री रवीन्द्र अधिकारीको निधनपछि रिक्त भएको कास्की क्षेत्र नम्बर २ बाट निर्वाचन लड्न प्रधानमन्त्री ओलीले आग्रह गरेका थिए गौतमलाई। अधिकारीकी श्रीमती विद्या भट्टराई नै उठ्ने भएपछि गौतम रोकिए। प्रत्यक्ष निर्वाचनबाट संसदमा आउने सबैजसो बाटाहरु बन्द भएपछि गौतम राष्ट्रियसभामा आउन प्रयास गरेका थिए। राष्ट्रियसभाबाट प्रधानमन्त्री बन्न नपाइने भएपछि संविधान संशोधन सर्त राखेका थिए।

पछिल्लो समय पाल्पा क्षेत्र नम्बर १ का प्रतिनिधिसभा सांसद दलबहादुर रानालाई राजीनामा गराएर गौतमले चुनाव लड्ने विषयले राजनीतिक वृत्तमा प्रवेश पाएको छ। तर सांसद् रानाले भने आफूले राजीनामा गरेर वामदेव कमरेडलाई छोड्नेबारे कुनै छलफल नै नभएको भन्दै अनविज्ञता प्रकट गरे।

‘मलाई मिडियाका साथीहरुले फोन गरिरहेका छन्। मलाई थाहा नै छैन। राजीनामाबारे अहिलेसम्म कुनै नेतासँग भेटेर छलफल समेत गरेको छैन। यस्तो कसरी हुन सक्छ? ’ रानाले भने, ‘मिडियाकर्मीले पनि बुझेर समाचार नलेख्दा पीडित बनाए। तपाईं पनि सत्यतथ्य बुझेर लेख्नुस्। ’ आफूले निर्वाचन जितेको क्षेत्र छोडेर अरुलाई छोड्ने विषयमा सोच्नसमेत नसकिने रानाले बताए।

नेता राना गौतम निकट भएपनि राजीनामाबारे आफूलाई जानकारी नभएको नेता ठाकुर गैरेले बताए। ‘दलबहादुर राना र मेरो एउटै जिल्ला हो। उहाँको निकटता वामदेव कमरेडसँग अलि धेरै हो,’ गैरेले भने, ‘तर, उहाँलाई राजीनामा गराएर वामदेव कमरेडलाई उठाउनेबारेमा थाहा भएन। थाहा नभएको कुरा हो कसरी भन्नु?’