एजेन्सी- चीनको राजधानी बेइजिङ्ग नजिकैको हिबेई प्रान्तमा कोरोना भाइरस संक्रमण देखिएपछि कडा लकडाउन लगाएको छ। हिबेई प्रान्तको एनसिनमा लकडाउन लगाउँदा त्यहाँका करिब चार लाख नागरिक प्रभावित भएका छन्।
आइतबारबाट सो क्षेत्रमा अत्यावश्यक सेवा बाहेक सबै क्षेत्र बन्द गरिएको छ। आवश्यक सेवामा संलग्न बाहेक अन्यलाई घर बाहिर निस्कन रोक लगाइएको छ। घरका लागि आवश्यक वस्तु किन्न घरबाट निश्चित समयमा एक जनामात्र बाहिर निस्कन पाउनेछन्। कसैले आदेश उलंघन गरे प्रहरीले कडा कारवाही गर्ने प्रशासनले चेतावनी दिएको छ।
एनसिन बेइजिङ्गभन्दा एक सय ५० किलोमिटर दक्षिणमा छ। दुई साताअघि बेइजिङ्गमा कोरोना संक्रमण दोहोरिदा एनसिनमा समेत १८ जनामा संक्रमण देखिएको थियो। यो सहर अन्य क्षेत्रको तुलनामा अलि बढी नै भिडभाड हुने क्षेत्रमा पर्छ।
बेइजिङ्गको अवस्था के छ?
अन्य देशको तुलनामा चीनमा कोरोना संक्रमणको केस निक्कै न्यून छ। तर पछिल्लो पटक पुनः कोरोना संक्रमण दोहोरिएपछि चिनियाँ अधिकारीहरु अलि बढि चिन्तित भएका छन्। २४ घन्टाको बीचमा बेइजिङ्गमा कोरोना संक्रमणका १४ नयाँ संक्रमित फेला परिसकेका छन्। मध्य जुनमा बेइजिङ्गमा संक्रमण दोहोरिएपछि अहिलेसम्म ३ सय ११ जना संक्रमित फेला परिसकेका छन्।
संक्रमण फैलन नदिन चीनले बेइजिङ्ग नजिक रहेका प्रान्त र सहरमा कडाइ गरिरहेको छ। उसले आवतजावतमा रोक लगाउँदै परीक्षणको गति बढाएको छ। मार्चको प्रारम्भमा चीनमा ८० हजार कोरोना संक्रमित थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749384056.png)
