अन्योलमा प्रशिक्षक आगमन: अल्मुताइरी र एन्फाले चाहेर हुँदैन, कतारको निर्णय नै अन्तिम!

फुटबल

दीप सुवेदी आइतबार, असार १२, २०७९ १७:२८

काठमाडौं- नेपाली फुटबल वृत्तमा एकै प्रश्नले जरो गाडेको छ–राष्ट्रिय टोलीका मुख्य प्रशिक्षक अब्दुल्लाह अल्मुताइरी नेपाल फर्किन्छन् कि फर्किँदैनन्? यो प्रश्न जति चाखलाग्दो छ, उति नै यसको उत्तर रहस्यमय छ।

कारण हो, अखिल नेपाल फुटबल संघ (एन्फा)को नयाँ कार्यसमिति। पछिल्लो समय निकै विवादमा रहेका प्रशिक्षक अल्मुताइरीको एन्फा अध्यक्ष पंकज विक्रम नेम्वाङसँगको सम्बन्ध सुमधुर छैन।

जतिबेला नेम्वाङ वरिष्ठ उपाध्यक्ष थिए, त्यतिबेला अल्मुताइरीले नेम्वाङले आफूलाई काम गर्न नदिएको आरोप लगाएका थिए। अहिले पनि अल्मुताइरी खुलेर बोल्ने मौका पाएभने उनैमाथि यही आरोप दोहर्‍याइ रहन्छन्।

गत सोमबार बूढानीलकन्ठस्थित पार्क भिलेज रिसोर्टमा सम्पन्न २१औं केन्द्रीय कार्यसमितिको साधरणसभामा निवर्तमान अध्यक्ष कर्माछिरिङ शेर्पालाई ६ मतले पराजित गर्दै नेम्वाङ एन्फाको अध्यक्षमा निर्वाचित हुँदै गर्दा अल्मुताइरीले सहकार्य नगर्ने संकेत गरेका थिए।

अल्मुताइरीले इन्स्टाग्राम–स्टोरीमा लेखेका थिए,’आगामी दिनमा नेपाली फुटबलको सफलताको कामना गर्दछु। उत्कृष्ट अनुभवको लागि धन्यवाद नेपाली फ्यानहरू, नेपाल सधैं मेरो हृदयमा रहनेछ तर हरेक कथा समाप्त भएको छ।’ यद्यपि, अल्मुताइरीले त्यो स्टोरी केहीबेर पछि नै हटाए।

उनले सामाजिक सञ्जालमार्फत् नै यस्तै लेख्नु स्वाभाविक थियो। यता, एन्फा नेतृत्वको नतिजा पनि अल्मुताइरीले चाहेको जस्तो थिएन। उनी निकट मानिएका अध्यक्ष शेर्पा पराजित भइसकेका थिए। हुन त उनले यसअघि नै शेर्पाबाहेक नयाँ टोलीसँग आफू काम नगर्ने बताएका थिए।

उनले स्टोरी राख्नुभन्दा केहीबेर अघि मात्रै अध्यक्षमा जित हासिल गरेका नेम्वाङले पनि अल्मुताइरीलाई निरन्तरता दिन नसक्ने बताएका थिए। उनले भनेका थिए, ‘छानबिन समितिले प्रतिवेदन दिइसकेको छ। अब पहिलो बैठकबाटै त्यसको कार्यान्वयन अगाडि बढ्छ। चाँडै विवाद समाधान हुन्छ।’

एएफसी एसियन कप छनोटको तयारीमा रहेका नेपाली राष्ट्रिय टोलीका मिडफिल्डर रोहित चन्दलाई प्रशिक्षक अल्मुताइरीले पटक–पटक क्याम्प छोड्न निर्देशन दिएको भन्दै विशाल राई, अनन्त तामाङ, विशाल श्रेष्ठ, अञ्जन विष्ट, सुजल श्रेष्ठ र विमल घर्तीमगरलगायतका १० खेलाडीले वैशाख १३ गते ‘विद्रोह’ गरेका थिए।

उनीहरुलाई माल्दिभ्समा व्यावसायिक फुटबल खेलिरहेका नियमित कप्तान तथा गोलरक्षक किरणकुमार चेम्जोङले पनि सामाजिक सञ्जालबाट साथ दिएका थिए। प्रशिक्षक अल्मुताइरीले वैशाख १८ गते एन्फाका महासचिव तुलाधरलाई एक पत्र लेख्दै असन्तुष्ट खेलाडीलाई राष्ट्रिय टोलीमा नराख्ने बताएका थिए। किरणसहित १० सिनियर खेलाडी टिमबाहिर रहँदा अल्मुताइरीले नयाँ खेलाडीलाई मौका दिए।

एसिया कप तेस्रो चरणको छनोटमा समूह ‘ए’ मा रहेको नेपालले जोर्डनसँग २, कुवेतसँग ४–१ र इन्डोनेसियासँग ७–० को हार व्यहोरेको थियो। प्रतियोगितामा एक मात्रै गोल कुवेतविरूद्व दर्शन गुरूङले गरेका थिए। नेपाली टोलीको कप्तानी नवयुग श्रेष्ठ र पुजन उपरकोटीले गरेका थिए।

एसियन कप खेल्न जानुअघि नै विवादले नेपाली टोलीको तयारीलाई समेत असर गरेको थियो। अधिकांश खेलाडी टोलीबाहिर रहँदा अफगानिस्तानसँग खेल्ने भनिएको मैत्रीपूर्ण खेल अन्तिम समयमा स्थगित भयो। तर, एन्फाले भने अफगानिस्तानको टोली कतार नजाने भएको कारण उक्त खेल रद्द गरेको दाबी गर्‍यो।

खेलाडी र प्रशिक्षकबीच विवाद बढेपछि एन्फाले छानबिन गर्न कार्यदल गठन गरेको थियो। कार्यदलले एसियन कप छनोटपछि कतार फुटबल एसोसिएसनको सहयोगमा नेपालको प्रशिक्षक बनेका अल्मुताइरीको विकल्प खोज्न सिफारिस गरेको थियो।

अल्मुताइरी र एन्फाबीच सन् २०२४ सम्मका लागि सम्झौता छ। ‘मुख्य प्रशिक्षक स्वास्थ्य अवस्थाका कारण बारम्बार तनावमा देखिनु, स्वास्थ्य परीक्षणको लागि बिदा स्वीकृत रहेको अवस्था, फरक सामाजिक र सांस्कृतिक परिवेश, बारम्बार विवाद तथा सामाजिक सञ्जालमा अनावश्यक टिका टिप्पणी जस्ता क्रियाकलापले राष्ट्रिय टोलीमा स्वस्थ वातावरण नबनेको देखिन्छ। यस्तो अवस्थामा भविष्यमा अरू समस्या उब्जने प्रवल सम्भावना समेत नकार्न सकिदैन। तसर्थ एसिया कप छनोटपछि कतार एफएसँगको सहयोगलाई निरन्तरता र सहमति कायम गरी मुख्य प्रशिक्षकको अर्को विकल्प खोज्न सिफारिस गरिन्छ,’ कार्यदलको सुझाव थियो।

नेम्वाङले पनि यही कार्यदलको सुझावलाई कार्यान्वयन गर्ने बताए। त्यसयता प्रशिक्षक अल्मुताइरीको भविष्य अन्यौलमा थियो। यता, बुधबार नेम्वाङको अध्यक्षतामा बसेको पहिलो कार्यसमितिको बैठकले प्रशिक्षक पनि अल्मुताइरीको निर्णयविरुद्ध गएर टोली बाहिर रहेका ११ खेलाडीलाई स–सम्मान फिर्ता बोलाउने निर्णय गर्‍यो। यस्तै, प्रशिक्षकको हकमा भने अल्मुताइरी र कतार फुटबल संघसँग समन्वय गरी छानबिन समितिको सुझाव कार्यान्वयन गर्न सचिवालयलाई निर्देशन दियो।

बैठको पहिलो निर्णय स्पष्ट थियो– अल्मुताइरीको विकल्प खोज्ने। तर, उनलाई भने हटाउन त्यति सहज भने थिएन। २०७८ चैतमा एक वर्षका लागि नेपाली राष्ट्रिय टिमको प्रशिक्षक नियुक्त भएका अलमुताइरीसँग गत कात्तिकमा एन्फाका निर्वतमान अध्यक्ष कर्माछिरिङ शेर्पा र कतार फुटबल एशोसिएसनका प्रतिनिधिसँगको छलफलपछि थप तीन वर्षका लागि नयाँ सम्झौता भएको थियो।

तर, त्यसअघि अल्मुताइरीले साफ च्याम्पियनसिप २०२१ को फाइनल खेल प्रमुख प्रशिक्षकको रूपमा अन्तिम भएको बताएका थिए। फाइनलपछि भने उनले बोली फेरे। उनले दुई साता आराम गर्ने र एन्फाले चाहेमा नेपाल फर्कने प्रतिक्रिया दिएका थिए।

भारतसँग फाइनलमा नेपाल पराजित भएपछि अल्मुताइरी माल्दिभ्सबाटै आफ्नो देश कुवेतका लागि प्रस्थान गरेका थिए। अल्मुताइरीलाई कतार फुटबल एसोसिएसनले नेपालमा प्रशिक्षण गर्न गत वर्ष पठाएको थियो। नेपाललाई सहयोगस्वरूप प्रशिक्षक उपलब्ध गराएको कतारले नै अल्मुताइरीलाई तलब र सुविधा दिने गरेको छ। एन्फाले नेपालमा रहँदा अल्मुताइरीको बस्ने व्यवस्था मिलाउँदै आएको छ।

निर्वाचनताका नै नेम्वाङ समूहले प्रशिक्षक अल्मुताइरीको बर्खास्तीको माग राखेको थियो। तर, तत्कालीन कर्मा नेतृत्व भने अल्मुताइरीलाई निकाल्न आनाकानी गर्दै आएको थियो। जुन कुराको नेम्वाङ आफैंले बिरोध गर्दै आएका थिए।

अबको विकल्प के?
अल्मुताइरीले शनिबार सामाजिक सञ्जालमार्फत् पुन: नेपाल फर्किने संकेत गरेका छन्। उनले फेसबुकमा स्टोरी राख्दै अबको लक्ष्य फिफा विश्वकप २०२६, एसिया कप २०२७ क्वालिफायर र साफ कप २०२३ रहेको उल्लेख गरेका छन्। तर, उनलाई फर्काउने या नफर्काउने भन्ने अन्तिम निर्णय भने एन्फाले गर्ने छ।

एन्फाका नवनियुक्त महासचिव किरण राईले आफू प्रशिक्षक अब्दुल्लाहसँग सम्पर्कमै रहेको बताए। उनका अनुसार अल्मुताइरीले आफू नेपाल फर्किन तयार रहेको बताएका छन्।

‘उहाँ अहिले स्वास्थ्य परीक्षणका क्रममा कुवेतमा हुनुहुन्छ। उहाँसँग छलफल हुन बाँकी रहे पनि स्वास्थ्य परीक्षण सकेर नेपाल फर्कने बताउनुभएको छ,’ उनले भने।

तर, अल्मुताइरीलाई फर्काउने या नफर्काउने भन्ने विषयमा भने निर्णय गर्न बाँकी रहेको उनले जानकारी दिए। ‘प्रशिक्षकसँग म सम्पर्कमै छु। उहाँसँग छलफल पनि भएको छ। उहाँ नेपाल फर्किन इच्छुक हुनुहुन्छ। तर, छानबिन समितिको प्रतिवेदन अनुसार उहाँलाई ल्याउन पर्ने हुन्छ। यसबारे हामीले अहिल्यै निर्णय गरिहालेका छैनौं,’ राईले नेपाल लाइभसँग भने।

तर, अल्मुताइरीलाई नेपाल फिर्ता पठाउन भने कतार फुटबल संघले एन्फासँग केही सर्त राख्ने बुझिएको छ। अल्मुताइरीसँगको विवाद र कोरोनाकालमा सबै प्रायोजकले हात उठाएको अवस्थामा नेपालको ‘ए’ डिभिजन लिग सञ्चालन गर्न कतार एयरलाइन्सले मुख्य प्रायोजन गरेको विषयमा नेम्वाङले प्रश्न उठाएका थिए। उनी त्यतिबेला एन्फाको वरिष्ठ उपाध्यक्ष थिए।

एन्फामा नयाँ कार्यसमिति निर्वाचित भएर आउँदासमेत कतारले शुभकामना दिएको छैन। ‘विगतमा नेपाली फुटबललाई कतारले बारम्बार सहयोग गर्दै आएको छ। तर, त्यो गुन बिर्सिएर जतिबेला पनि प्रशिक्षकलाई विवादमा ल्याउने काम नेम्वाङ समूहबाट भइरहेको छ। त्यसै कारण कतार उहाँसँग सहकार्य गर्न डराइरहेको छ,’ उच्च स्रोतले नेपाल लाइभलाई भन्यो।

कतारको बुझाइ छ, नेपाल साफ च्याम्पियन्सिपका लागि माल्दिभ्स जानुअघि प्रशिक्षकलाई विवादमा तान्न नेम्वाङ समूहले योजनाबद्ध रूपमा काम गर्‍यो। त्यतिबेला नेपाल इक्वेस्टेरियन संघका अध्यक्ष रवी राजकर्णिकारको मध्यस्थतामा नेपालस्थित कतारी राजदूतको प्रयासमा समाधान खोज्ने कार्य भएको थियो। तर, बैठकमा नेम्वाङ अनुपस्थित भएर असहयोग गरेका थिए। त्यसलाई अहिले पनि कतारले आफूहरूलाई उपेक्षा गरेको रूपमा बुझेको छ।

नेम्वाङ निर्वाचित भएपछि पहिलो कार्यसमितिबाट विदेश विभागमा नियुक्त भएका नवीन पाण्डेको विषयमा पनि कतार त्यति सन्तुष्ट छैन। उनले प्रो–लाइसेन्स प्राप्त अल्मुताइरीलाई फुटबल सिकाउन नआउने भन्दै उनको विकल्प खोज्न सुझाव दिएका थिए।

प्रशिक्षक तथा कतारको विषयमा उनले आफ्नो सामाजिक सञ्जालमा राखेको विचारलाई पनि कतारले संवेदनशील भएर हेरेको छ। एन्फा निर्वाचनमा फिफाले भ्रष्टाचारको मुद्दामा १० वर्ष कारबाही गरेको गणेश थापा पनि सक्रिय भएको भन्दै कतार सश‌ंकित देखिएको छ।

हाल कतारले नेपाली फुटबललाई कोचिङ कोर्ष, प्रो–लाइसेन्स कोर्ष, विदेशमा क्लोज क्याम्पमा बस्न ट्रेनिङको सम्पूर्ण सुविधा, रिहाव ट्रेनिङ र मेडिकल ट्रिटमेन्टको सुविधा दिँदै आएको छ। नेपाली राष्ट्रिय टोलीको प्रशिक्षकका लागि तलब पनि उसैले उपलब्ध गराउँदै आइरहेको छ।

यस्तै, लिग सञ्चालन गर्न कतार एयरलाइन्सले वार्षिक १ लाख ५० हजार डलर उपलब्ध गराउँदै आइरहेको छ। ‘प्रशिक्षक नेपाल फर्किन चाहेर पनि हुने कुरा होइन। एन्फाले फर्काउन चाहेर हुने कुरा पनि होइन। जुन सौहार्दपूर्ण सम्बन्ध थियो, त्यो नेम्वाङ समूहले बिगारिदिएको छ। प्रशिक्षक फर्किएपछि उनलाई काम गर्न दिने वातावरण पनि देखिएको छैन। त्यसैले अहिले कतार नेपालसँग सहकार्य गर्ने कि नगर्ने विषयमा द्विविधा छ। यो सहकार्य समाप्त पनि हुनसक्छ,’ ती व्यक्तिले भने।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।