काठमाडौं– मुख्य प्रशिक्षक पुबुदु दासानायकेले राजीनामा दिएपछि नेपाली राष्ट्रिय क्रिकेट टोली प्रशिक्षकविहीन छ।
२०७८ मंसिरमा दोस्रोपटक नेपालको मुख्य प्रशिक्षक नियुक्त भएका पुबुदुले विश्वकप विजेता डेभ वाट्मोरको ठाउँ लिएका थिए। तर, एकदिवसीय विश्वकपको रोडम्यापको रुपमा रहेको क्रिकेट विश्वकप लिग टू मा नेपालको प्रदर्शन राम्रो हुन नसकेपछि स्कटल्यान्डमा भएको नेपाल, नामिबिया र स्कटल्याण्ड सम्मिलित सिरिज सकेर नेपाल फर्किए लगत्तै पुबुदुले राजीनामा घोषणा गरेका थिए।
अहिले नेपाल क्रिकेट संघ (क्यान) नयाँ प्रशिक्षकको खोजीमा छ। क्यान स्रोतका अनुसार यसअघि सर्ट लिस्टमा राखेकालाई नै मुख्य प्रशिक्षक बनाउने तयारी थालिएको छ।
‘पुबुदुलाई नियुक्ति गर्नुभन्दा अगाडि आवेदन परेकाहरुमध्येबाट हामीले सर्ट लिस्ट बनाएका थियौं। अहिले त्यी सर्ट लिस्टमा रहेकामध्येबाट मुख्य प्रशिक्षक नियुक्ति गर्ने तयारी थालेका छौं। हामीसँग निक्कै व्यस्त सेडुल भएको कारण पनि सर्ट लिस्टबाटै फास्ट ट्र्याकमा प्रशिक्षक नियुक्ति गर्नुपर्ने बाध्यता छ,’ ती पदाधिकारीले नेपाल लाइभलाई भने।
उनका अनुसार क्यानले भारतका लालचन्द राजपूत र मन्टि देशाई र अपूर्व देशाईमध्ये एकलाई प्रशिक्षक बनाउने तयारी थालिएको छ। तर, उनीहरु क्यानले दिने पारिश्रमिकमा सहमत हुन नसकेको ती पदाधिकारीले बताए।
‘पुबुदुलाई ल्याउनुभन्दा अगाडि नै मन्टि देशाईलाई ल्याउने योजना बनाएका थियौं। त्यतिखेर पनि उनले क्यानले दिनसक्नेभन्दा बढी पारिश्रमिक र केही शर्त राखेपछि पुबुदुलाई ल्याउन परेको थियो,’ उनले भने।
भारतीय नागरिक देशाई यसअघि नेपाली राष्ट्रिय क्रिकेट टोलीका ब्याटिङ कन्सल्ट्यान्ट थिए। देशाई वेस्ट इन्डिजका ब्याटिङ प्रशिक्षकसमेत भइसकेका छन्।
देशाईले नेपालसहित अफगानिस्तान, यूएई, क्यानडा, इन्डियन प्रिमियर लिग (आईपीएल) टोली गुजरात लायन्स, राजस्थान रोयल्स र भारतीय घरेलु क्रिकेटमा आन्द्र प्रदेशलाई प्रशिक्षण दिइसकेका छन्। सन् २०१४ को विश्वकपमा पनि देशाई नेपाली टोलीमा आबद्ध थिए।
सन् २०१५ मा क्यान निलम्बनमा हुँदा आयरल्यान्ड र स्कटल्यान्डमा भएको विश्वकप टी–२० छनोटमा देशाई नेपाली टोलीसँगै थिए। सन् २०१७ मा नेपाली यू–१९ टोलीले भारतलाई हराउँदा उनी नेपालका ब्याटिङ कन्सल्ट्यान्ट थिए।
‘नेपाली क्रिकेटलाई नजिकबाट नियालिसक्नुभएका कारणले उहाँले नेपालको ब्याटिङ लाइन सुधार गर्ने अपेक्षा गरेका छौं,’ ती पदाधिकारीले भने,‘यसअघि डेभ वाट्मोर मुख्य प्रशिक्षक भएर आउँदा उनको पनि चर्चा भएको थियो। तर, त्यो बेला वाट्मोरलाई ल्याइएको थियो।’
यता, अपूर्वले पनि नेपाली राष्ट्रिय क्रिकेट टोलीका ब्याटिङ कन्सल्ट्यान्ट भएर काम गरिसकेका छन्। यता, लालचन्द भारतीय टोलीका पूर्वराष्ट्रिय खेलाडी हुन्। उनी भारतीय टोलीको यू–१९ टोली, जिम्बावे र अफगानिस्तानका साथै इन्डियन प्रिमियर लिगमा मुम्बई इन्डियन्सको प्रशिक्षकसमेत भइसकेका छन्।
आईसीसीको वार्षिक साधारण सभामा सहभागी हुन इंग्ल्यान्ड गएका क्यान अध्यक्ष चतुरबहादुर चन्दसँगै कार्यबाहक सचिव प्रशान्तविक्रम मल्ल साउन १४ गते नेपाल फर्किने तय भएको छ। त्यसपछि मात्र नयाँ प्रशिक्षक नियुक्त प्रक्रिया अगाडि बढ्ने क्यानका जनरल म्यानेजर वृतान्त खनालले बताए।
नेपालले आगामी सेप्टेम्बरमा लिग–टू को अर्को सिरिज खेल्नुपर्नेछ। त्यसका लागि छिट्टै प्रशिक्षक नियुक्त गर्नुपर्ने क्यानलाई दबाब छ।
एकदिवसीय मान्यता जोगाउने चुनौती
क्यानभित्रको आन्तरिक किचलोको कारण सन् २०१४ मा नेपाललाई टी–२० विश्वकपमा पुर्याएका दासानायकेले त्यसको एक वर्षपछि नेपाली क्रिकेट छाडेका थिए। त्यसको ६ वर्षपछि पुन: दोस्रो कार्यकालका लागि फर्किएका दासानायकेले नेपालको एकदिवसीय मान्यता नै जोखिममा पारिएका छन्।
कम्तिमा शीर्ष तीनमा पर्ने लक्ष्यसहित स्कटल्यान्ड भ्रमणमा निस्किएको नेपालले लज्जास्पद ब्याटिङ गर्दै चारमध्ये तीन खेल हार व्यहोरेको थियो। अन्तिम खेलमा स्कटल्यान्डसँग जम्मा १ सय २८ रनमा अलआउट भयो। नामिबियासँग २ सय रनको विजयी लक्ष्य पछ्याउनेक्रममा १३६ रनमा सबै विकेट गुमायो।
सन्दीप लामिछानेको कप्तानी र दासानायकेको प्रशिक्षणमा नेपालले १४ ओडीआईमध्ये ९ हार र ४ जित हात पारेको थियो। एक खेल बराबरीमा सकिएको थियो। टी–२० क्रिकेटमा १३ खेलमा १० जित र ३ हार छ। ओडीआईको १२ खेल विश्वकप लिग–टू का हुन्। जसमा नेपालले ७ खेलमा हार व्यहोरेको छ। त्यसैको कारण शीर्ष तीनमा रहँदै सोझै विश्वकप छनोट खेल्ने नेपालको समीकरण कठिन बनेको छ ।
यता, शीर्ष पाँचमा पर्दै ओडीआई मान्यता जोगाइराख्ने सम्भावना पनि समाप्त हुँदै गएको छ। आईसीसीको यसअघिको एकदिवसीय मान्यताको आधिकारिकतालाई मान्ने हो भने हालसम्म शीर्ष पाँचमा पर्ने टोलीले मान्यता जोगाइराख्ने छन्। नेपालले १६ खेल खेल्न बाँकी छ। शीर्ष तीनमा पर्न १२ खेल माथि जित्नुपर्ने हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751793737.png)
-1749826086.png)
