काठमाडौं– नेपाली नागरिकलाई भुटानी शरणार्थी बनाएर ठगी गरेको प्रकरणमा नेपाली कांग्रेसका नेता तथा पूर्व गृहमन्त्री बालकृष्ण खाणदेखि उनकी पत्नी मञ्जु खाण र कांग्रेस सभापति शेरबहादुर देउवाकी पत्नी तथा केन्द्रीय सदस्य एवम् सांसद् आरजु राणा देउवा पनि तानिएका छन्।
मञ्जु र आरजुले समेत रकम बुझेको भन्ने अडियो सार्वजनिक भएपछि प्रहरीले यो प्रकरणमा थप प्रमाण संकलनको काम गरिरहेको छ। अडियोमाथि पनि अनुसन्धान भइरहेको जिल्ला प्रहरी परिसर काठमाडौंका एसएसपी दानबहादुर कार्कीले बताएका छन्।
‘दलाल र पीडितबीचको भनिएको अडियो वार्ता हामीकहाँ पनि आइपुगेको छ। अडियोमा उल्लेख गरिएका विषयहरुलाई तथ्यले पुष्टि हुने ठाउँ छन्/छैनन् भनेर अनुसन्धान गरिरहेका छौं,’ एसएसपी कार्कीले भने।
सार्वजनिक भएको अडिओमा कांग्रेसकी सांसद आरजुलाई साढे २ करोड र तत्कालीन गृहमन्त्री खाणकी पत्नी मञ्जुलाई ६ करोड रकम बुझाएको दाबी गरिएको छ। खाण र आरजु पक्षबाट उक्त अडियो सत्य नभएको दाबी भइरहेको छ। आइतबारको प्रतिनिधि सभा बैठकमा समेत आरजुले आफूमाथि झुटा आरोप लगाइएको दाबी गरिन्।
यता बालकृष्ण खाणको सचिवालयले पनि अडियोमा सत्यता नरहेको दाबी गर्दै खण्डन गरिरहेको छ। तर तत्कालीन गृहमन्त्री खाण यो प्रकरणमा जोडिनुमा अडिओ मात्रै प्रमाण नरहेको रहस्यहरु खुल्दै आएका छन्।
१ वर्षअघि काठमाडौं उपत्यका अपराध अनुसन्धान कार्यालयले भुटानी शरणार्थी ठगी प्रकरणमा १ जनालाई पक्राउ गरेको थियो। त्यतिबेला गृहमन्त्री बालकृष्ण खाण थिए भने हाल शरणार्थी प्रकरणमै पक्राउ परेर हिरासतमा रहेका टेकनारायण पाण्डे गृहसचिव थिए।
तत्कालीन गृहमन्त्री खाण र गृहसचिव पाण्डेकै दबाबमा पक्राउ परेकाहरुलाई प्रहरीले आधा घण्टा पनि हिरासतमा नराखी छाडेको थियो। काठमाडौं उपत्यका अपराध अनुसान्धान कार्यालयका तत्कालीन प्रहरी कर्मचारीका अनुसार त्यतिबेला गृहमन्त्री खाणसँगै गृहसचिव पाण्डेले पक्राउ परेकाहरुलाई छाड्न भनेर तारान्तर दबाब दिएका थिए।
भुटानी शरणार्थी प्रकरणमा पूर्वगृहमन्त्री खाण जोडिने अर्को दस्तावेज समेत भेटिएको छ। २०७८ असारमा गृहमन्त्री भएका खाणकै जोडबलमा गृह प्रशासनबारे ज्ञान नै नभएका टेकनारायण पाण्डेलाई गृहसचिवको जिम्मेवारी दिइएको थियो।
एमाले अध्यक्ष केपी ओली नेतृत्वको तत्कालीन सरकारमा गृहमन्त्री रहेका रामबहादुर थापा (बादल)का पालामा २०७६ जेठमा भुटानी शरणार्थी समस्या समाधान गर्ने भन्दै गृह मन्त्रालयकै तत्कालीन सहसचिव बालकृष्ण पन्थीको संयोजकत्वमा कार्यदल गठन गरिएको थियो। कार्यदलले समेत नक्कली भुटानी शरणार्थीको नाम राखेको भन्दै उक्त प्रतिवेदन कार्यान्वयनमा आएको थिएन।
खाण गृहमन्त्री र टेकनारायण गृहसचिव भएपछि उनीहरुको अग्रसरतामा पुनः अर्को समिति गठन गरिएको थियो। उक्त समितिका संयोजक थिए जिल्ला प्रशासन कार्यालय झापाका तत्कालीन सहायक सीडीओ। उक्त समितिलाई २०७९ भदौ मसान्तसम्म भुटानी शरणार्थीका बारेमा थप कार्यसम्पादन गरी पेस गर्न भनिएको थियो।
आवश्यक परे उक्त समितिले उपसमिति गठन गर्न सक्ने र पन्थी नेतृत्वको समितिले पेस गरेका प्रतिवेदन समेत अध्ययन गरी छुट भुटानी शरणार्थीको नाम समावेश गर्न समेत भनिएको थियो। तर जिल्ला प्रशासन कार्यालय झापाका तत्कालीन अधिकृतहरुले भुटानी शरणार्थी प्रकरण विवादमा परिसकेकाले आफूहरु थप विवादमा नफस्ने भन्ने अडान लिएपछि काम अगाडि बढेन।
झापा प्रशासनबाट काम अगाडि नबढेपछि नक्कली शरणार्थी बनाएर अमेरिका पठाउने योजना असफल हुन थालेको थियो। अमेरिका जान भनेर रकम बुझाएकाहरुले ‘हाम्रो काम कहिले बन्छ?’ भन्दै पैसा लिने बिचौलियालाई दबाब दिन थाले। बिचौलियाहरु फोन अफ गरेर सम्पर्कविहीन भएपछि पैसा बुझाएकाहरु प्रहरीकहाँ पुगेका थिए।
खाणले आफ्नै पालामा पुन: अर्को समिति गठन गरेर छुट शरणार्थीहरुको नाम समावेश गर्न लगाउनु पनि रहस्यमय रहेको भन्दै अहिले अनुसन्धान अघि बढाइएको छ।
यो प्रकरणमा पक्राउ परेका बिचौलियाहरुले पनि तत्कालीन गृहमन्त्री खाणसहितका एमाले सचिव तथा पूर्वउपप्रधानमन्त्री टोपबहादुर रायमाझी, गृह मन्त्रालयका तत्कालीन सचिव टेकनारायण पाण्डे, इन्द्रजित राईहरुको नाम लिएका थिए। बिचौलियाहरुको बयानअनुसार उनीहरुविरुद्ध पक्राउ पूर्जी जारी गरिएको हो भने केहीलाई प्रहरीले पक्राउ पनि गरेको छ। पक्राउ पूर्जी जारी भएका एमाले सचिव रायमाझी, तत्कालीन गृहमन्त्री बादलका छोरा प्रतीक थापा लगायत भने अहिले पनि फरार छन्।
पक्राउ परेकाहरुको बयान र उनीहरुबाट बरामद भएका केही प्रमाणका आधारमा थप केही जनामाथि पनि अनुसन्धान सुरु गरिएको प्रहरीको भनाइ छ। ‘पर्याप्त प्रमाण’ जुटाएर थप व्यक्तिविरुद्ध पनि पक्राउ पूर्जी जारी हुने प्रहरी स्रोतको भनाइ छ।
खाणभन्दा अघि गृहमन्त्री भएका एमाले नेता बादल भने यो प्रकरणमा अहिलेसम्म ‘सिन’मा नदेखिएको प्रहरी स्रोतको भनाइ छ। पक्राउ परेका परेका सचिव पाण्डेको मोबाइल फरेन्सिक जाँचका लागि पठाइएकाले त्यसबाट केही तथ्यहरु खुल्न सक्ने प्रहरीको भनाइ छ।
यो प्रकरणमा अहिलेसम्म ८ जना पक्राउ परेका छन्। एमाले नेता रायमाझीका छोरा सन्दीप, सचिव टेकनारायण पाण्डे, एमाले नेता तथा तत्कालीन गृहमन्त्री बादलका सुरक्षा सल्लाहाकार इन्द्रजित राई, ललितपुर महानगरपालिका–२३ घर भएका ५० वर्षीय सानु भण्डारी, मोरङको पथरी शनिश्चरे नगरपालिका–१० घर भएका ४९ वर्षीय केशवप्रसाद दुलाल, पाँचथरको फिदिम नगरपालिका–७ घर भएका ४५ वर्षीय टंककुमार गुरुङ, दाङ घर भएका सन्देश शर्मा र मोरङको पथरी शनिश्चरे नगरपालिका–१० का पूर्ववडाध्यक्ष सागर राई पक्राउ परेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1668178073.jpg)
